كتب - محرر الاقباط متحدون
أشاد الكاتب محمد ابو قمر، بفوز الفيلم المصري "رفعت عيني للسما" إخراج أيمن الأمير وندى رياض، بجائزة العين الذهبية لأفضل فيلم وثائقي في مهرجان كان السينمائي في دورته الـ77.
وكتب ابو قمر عبر حسابه على فيسبوك :" أنا شوفت حته صغيره من فيلم رفعت عيني للسما ، إيه الجمال ده!! ، كل الآمال إللي نفسك تتحقق لبلدك بتقوله ابنة قرية البرشا في جمله من 3 كلمات ، كل الأوجاع إللي بتعاني منه البنت المصرية في وسط مجتمع متسلف بتعبر عنه ابنة البرشا بنظره خاطفه من عيونها ، وإنت بتشوف الفيلم تتمني تكون كل بنت من البنات دي بنتك أو اختك أو حتي بنت الجيران إللي مبرتفرش تنام من شدة حبك .
وإنت بتابع الفيلم دماغك بينور ، ولما تنتهي المشاهد مش هاتعرف تنام من كتر التفكير في إزاي تعيش حياة تحترم فيها عقلك وتنسي البلوظه إللي بتتطبخ لنا كل يوم في الإعلام.
بنات البرشا بتوع رفعت عيني للسما جايين من صور البنات المرسومه في المعابد المصرية من آلاف السنين ، يتهيألك إنهم ملايكه ، بيقولوا كل الكلام إللي عجزت كل الألسنه المشلوله إنها تقوله .
بنات البرشا شبه البنت الحلوه إللي كنت بستناها ع الناصيه كل يوم وهي رايح المدرسه يمكن تحن عليا بنظره بس من عنيها ، كانت بتعدي كل يوم وهي رايحه المدرسه حاضنه شنطتها والهوا بيلاعب شعرها ، وساعة ما تقرب مني قلبي ينط وروحي ترفرف وكل الكلام إللي كنت عايز اقوله لها يروح واتلبخ والعبير إللي بيفوح منها يتوهني .
بنات البرشا زي نسمه الهوا الطريه ساعة العصاري تحت شجرة التوت ، زي مية النيل في صفائها ورقتها وعذوبتها ، زي زقزقة العصافير ساعة انبلاج الصبح ، خليك فاكر مصر جميله بس علشان كل بناتها حلوات وبالذات البنات إللي رفعوا راسنا للسما.
