أسماء جلال عن "أشغال شقة": "حسيت إن أنا اللي هبوظ المسلسل"

 

وتطرقت أسماء جلال حديثها عن كواليس مشاركتها بفيلمي "اللعب مع العيال" و"ولاد رزق 3: القاضية" اللذان تم عرضهما مؤخرًا ضمن موسم أفلام عيد الأضحى ويحققان نجاحًا كبيرًا بشباك التذاكر، إلى جانب كواليس تعاونها لأول مرة مع المخرج الكبير شريف عرفة، وعن النجاح الذي فاق كل التوقعات لإيرادات فيلم "ولاد رزق 3: القاضية"، إلى جانب علاقتها بنجوم الوسط الفني، وأسرار وكواليس تخص حياتها الشخصية كشفت عنها لأول مرة.

 

وعن مشاركتها بمسلسل "أشغال شقة" الذي عرض بموسم رمضان الماضي، قالت: "أول ما قالوا أني هعمل مسلسل كوميدي مع هشام ماجد وأستاذ خالد دياب، حسيت إن أنا الحاجة اللي هبوظ المسلسل، لأن هشام دمه خفيف أوي وأستاذ خالد دمه خفيف أوي في الكتابة، وأنا ببقى لذيذة ودمي خفيف مع أصحابي في القعدات القريبة، بس مش عارفة في التليفزيون هبقى عاملة إزاي؟، قولت طب هجرب وقعدنا وقلت له هي المواقف نفسها بتضحك ولا أنا اللي هضحك، قالي لأ المواقف، قولتله "يالا بينا" ومكنتش عايزة الناس تكرهني، ولما قرينا السيناريو مع بعض ولقيت أن كل حلقة في حد بييجي يساعدنا في البيت، قولت أنا معملتش كده قبل كده فيالا بينا".

 

وأضافت: "المفروض في المسلسل تخنت حاجة و80 كيلو، والبدلة كان المفروض تبقى أتخن من كده بحوالي 30 كيلو وبعدين صعبت تقريبًا على أستاذ خالد فقرر يخسسها شوية، لأن لما بتلبسي البدلة جسمك ما بيتنفسش بتفضلي لابسة طبقات فوق بعض وكل ده اسنفج، مع السليكون بيتلزق بكحول ووشك يصاب بالحكة طول الوقت مع اللغد بيفضل قافش في البدلة وبتبقي قاعدة مش طايقة نفسك وأي حركة ماكنتش بعرف أعملها لا بعرف أضحك ولا بعرف أزعل وكنت مش عارفة احرك حاجة لأنه كان هيقع".

 

وتابعت: "وكنت لما بمشي ببقى عاملة زي البطريق كأن عندي التصاق وكان ضغطي بيوطا أول ما بلبس البدلة، وأول ما لبستها فقدت الوعي، بعد كده تاني مرة جابولي عصاير وحاجات ساقعة وأغمى عليا تاني مرة برضه، وكنا بناكل أكل كتير بطريقة مرعبة وأنا تخنت في المسلسل فعلا، ومشاهد الأكل أستاذ خالد بجد بيحبها أوي وبيحب ياخدها زوايا مختلفة وكان بيعجبوا تعبيرات الوشوش، وفي حياتي العادية أنا بستمتع بالاكل بس مش باكل كتير ومباكلش أي حاجة وخلاص لازم الحاجة تبقى معمولة بمزاج".

 

وعن رشاقتها، قالت: "أنا بتمرن وبلعب يوجا وبجري وبشرب كرفس وبقدونس بيجيب من الآخر، ولو آكلتي أي حاجة في دهون وشربتي بعدها كرفس وبقدونس هينزلك الماية اللي في جسمك عامة، وبشربه بعد أي وجبة دسمة أو ماية بالليمون".