ماجدة سيدهم

فيه فيديو مهم  بعنوان  "دي بنتي" لفريق better life  عن فتاة ناضجة  أحبت شاب مؤمن كما اظهره الفيديو  ومحل اعجاب لكثير من الفتيات ..وثقت به ثم تخلى عنها  بل وشهر بها  بنشر فيديو خاص بينهم .. 

 

من الفيديو نقدر نقول ..

 

*  أن مش دايما البيت بيكون مقصر ..لكن  طبيعي جدا  في كل مراحل عمرنا خاصة البدايات بيكون الاحتياج العاطفى ضرورة ملحة ..دا أمر طبيعي جدا وصحي  

 

لكن الخطورة في الاستغلال لأحد الطرفين خاصة البنت  واللعب بالمشاعر من الشباب بحجة" أنتي مش واثقة فيا " 

 

*مش كل من أظهر تقواه والتزامه الديني هو حد أمين وناضج إنسانيا ..ممكن جدا ودا للأسف  المنتشر أن الورع الديني بيخبي وراه خراب من جوه..

 

*الأسرة  في كل الأحوال لازم تكون هي الداعم الأول لأي بنت كانت ضحية في خطوه التخطي وتجاوز أصعب مشاعر  ممكن تعيشها بنت تعرضت للخذلان أو بالاستغلال حتى لو برغبتها ..

 

* كلمة للشباب ..حبيبي مش من الرجولة ولا الكرامة  لما البنت اللي حبتك ووثقت فيك وظنت فيك الاحترام  ومقدر مشاعرها أنك تتخلى عنها وتخذلها  وكمان تشهر بيها دي  وضاعة منك وانحطاط  مالوش علاج على فكرة غير معجزة  .. 

 

 وخلوا بالكم أوعوا تفتكروا ان البنات  بس هي اللي بتدفع التمن حتى لو المجتمع أعلن دا ..لكن الحقيقة واللي مش معلنة أن اللي بيدفع التمن  أغلى وأغلى  هو الشاب الذي استغل البنت سواء بتحرش او اغتصاب أو تشهير وخذلها بعد علاقة حب  ..دي جريمة اخلاقية 

 

 فأي  شاب  يفتكر أنه لو غدر بأي بنت وثقت بيه وهرب وسابها تواجهة مرارات وحدها  أنه بكدا بعيد عن المحاسبة  ..تبقى ياحبيبي غلطان ..وضاعتك دي ها تفضل تطاردك طول العمر ..حتى لو اتجوزت وبقيت أب..  هاتعيش أتعس وأمر حياة ..مش هاتنام وهتفضل صور البنات اللي ضيعتهم وخلتهم  ولعبت بيهم هاتلاحقك حتى وأنت في أدق علاقة مع زوجتك ..هاتشك في مراتك  وفي بناتك واخواتك  وهاتتحول لكائن  مخرب وعصبي وعنيف لأتفه الأمور  ومش قادر تعترف بفعلتك أحسن حد غيرك  يعرف أد ايه انت خسيس مهما كان وضعك ومنصبك ..

 

وخلي بالك هاتدفع التمن يعني هاتدفعه ولو بعد حين  والحكايات اللي بالواقع كتير أوي وقاسية جدا واللي وصلت أصحابها للطلاق من بعد سنين زواج  والانتحار  ..ماقدروا  يواصلوا حياتهم بشكل سوي  خاصة لما فضفضوا بالأذى اللي سببوه  لبنات ناس كتير ..(اللي عملته زمان  بيترد لي دلوقت) 

 

وزي مابنطالب البنت دايما تحافظ على نفسها أنت كمان مطلوب منك تحفظ رجولتك أدام نفسك وأهلك وبيتك .خليك راجل شريف  

 

بلاش نكون مجرمين  في حق بعض دا بيفقد الثقة بين الناس وبعضها  والعيشة كلها بتكون عبارة عن حذر وتربص متبادل 

 

وهي دي تبقا عيشة ..؟!