كتب - محرر الاقباط متحدون
قالت د. امل حرب الاستاذة بجامعة الإسكندرية :"
يعنى ايه عدل ؟ هل العدل انك تطالب بحقوقك فقط ؟ مفهومنا عن العدل سطحى جدا ، لذلك كلنا نعانى بسبب اعتقادنا الساذج عن العدل فى الحقوق والواجبات الشخصية فقط . تعالوا نشرح شرح مبسط جدا لمفهوم العدل .لعل حياتنا تكون أفضل .
مضيفة عبر حسابها على فيسبوك :" العدل والمساواة فى إعطاء الحقوق دون تمييز ، يعنى التساوى فى كل شئ ، العدل انك تنصر الضعيف والمظلوم مهما كلفك الأمر دون خوف ، المواطنة من العدل ، الجميع لهم نفس الحقوق والواجبات دون تمييز ، التعبير وحرية الرأى من العدل ، جاءت امرأة عادية صرخت بأعلى صوت فى وجه عمر بن الخطاب ( أيقونة العدل ) قالت له انت أخطأت ياعمر .ماذا فعل بمنتهى التواضع والاحترام قال جملته الشهيرة قد أصابت امرأة واخطأ عمر .لا قانون ازدراء أديان بقا ولا عمر خط أحمر انتى مين ..تؤ تؤ انه العدل عكس الظلم والتطرف ، وعدم التعدى على حقوق الغير سواء فكر ، أو رأى، او عقيدة ، أو مصالح شخصية .
وتابعت :" من العدل سيادتك تكون محترم حتى لو اختلفت مع شخص يكون بأخلاق ، من العدل انك تمشى مؤدب ومتنظرش لأى امرأة أو تتحرش بيها .ببساطة شديدة لأنك مش هتقبل حد يعمل نفس تصرفك مع أهل بيتك ، مش دة عدل برضوا ؟ على فكرة من العدل انك تكون انسان واعى على قدر من المعرفة والثقافة ، مش بقولك تبقا زويل ولا اينشتين . على الاقل تكتب صح وتعرف أصول الاختلاف .. ليه تخيل ؟ عشان الغباء والرجعية متعبة للناس اللى بتتعامل معاها، من العدل انك تتقن عملك بضمير ، اة والله مش تروح تمضى وتمشى ، أو تقعد ساعتين وتزوغ من الشغل تخيل دة عدل .من الحقوق أيضا المهمة اننا نعيش فى بيئة نظيفة وشوارع جميلة ..إلا هو مين اللى بيرمى الزباله فى الشوارع وأمام البيوت والمحلات .
اوعى تقولى الدولة !؟ ازعل والله ، تخيل دة مش عدل ابدا ، طيب وأصحاب المحلات اللى مطلعة البضاعة ٤ متر برة الرصيف وشلة حركة المرور بالساعات يادوب عربية تعدى !؟ اوعى تقولى الدولة ؟! ازعل بجد اة الدولة كل حملات تنزلهم وتعملهم غرامات وبرضوا مفيش فايدة تانى يوم ترجع ريمة لعادتها .
هو من العدل المدرس يروح يحضر حصة ويمشى عشان يلحق الدروس الخصوصية واخر الشهر يروح المدرسة يوم القبض ! هو مين بيساعد فى فشل التعليم !؟ اوعى تقولى الدولة .هزعلك بجد . هو اللى بيحصل دة من العدل !! اهداف العدالة والمساواة عدم التعدى وحماية المصالح الفردية والعامة ودى من المفاهيم الاخلاقية .
أيضا من الحقوق الإنسانية أن يولد جميع البشر احرار ومتساويين فى الكرامة والحقوق وإن يعاملوا بعضهم بعض بروح الإخاء .وتهذيب النفس ضد اى مطمع ، وإعطاء الحق لنفسه بأن يتدخل فى شؤن الاخر والحكم عليه لمجرد اختلافه معه فى العرق أو اللون أو العقيدة وطبعا دة يؤدى إلى فتن وتعصب ومشاكل لا حصر لها فى المجتمع .كلنا واحد ، كلنا إنسان .جئنا الارض لكى نعمرها ونتعايش سويا بالعدل والحب ، والكرامة ، الفرق بين الغابة والحياة هو قانون العدل الانسانى ، لذلك جميع الاديان اتكلمت عن العدل ، وكل الرسل والأنبياء جاءوا وفى مقدمة رسالتهم هى العدل والمساواة ..العدل من أسماء الله الحسنى لذلك حرم على نفسه الظلم لانه العدل الحق .
واختتمت :" العدل اساس الملك ,اساس الحياة ، اساس الكرامة ، اساس الإنسانية، اساس المواطنة ، اساس المحبة.
