ديڤيد ويصا
عاوز اتكلّم في حاجة ممكن تعمل مشكلة شويّة ..
بس الصّراحة مش قادر اشوفها واسكت!

فيه بعض المؤسّسات الدينيّة أو الهيئات المسيحيّة ..
أو الاجتماعات اللي في قاعات متأجّرة تحت قيادة شخص معيّن ..
بشوفها بتحاول بكل الطرق (مقصودة أو غير مقصودة) ..
تعمل كنيسة موازية، بدل الكنيسة المحليّة الموجودة والمتاحة ..

يعني أماكن فيها كنايس فعلًا، مش محرومة ..
تيجي الهيئة أو الاجتماع أو المؤسّسة دي ..
تقدّم خدمة ما (بأي شكل وتحت أي عنوان) ..
وكأنّها بتحاول تعوّض جزء مفقود في الكنيسة ..
زي الرعاية لناس مش مقبولين في الكنيسة لأي سبب ..
أو خدمة ناس عندهم احتياجات خاصّة ..

مش سهل يلاقوا حد في الكنيسة يساعدهم فيها ..
وفجأة تبتدي الهيئة أو الجماعة دي تقدّم اجتماعات بديلة للكنيسة ..
مدارس أحد، اجتماع اعدادي وثانوي، واجتماع جامعة، وسيّدات ..
ومع الوقت وعشان ضمان العدد أو التمويل ..

لازم يكون فيه حاجة تحافظ على انبهار الناس ..
زي نوعيّة خدمات حماسيّة وتشجيعيّة طول الوقت ..
ودي توجُّهها في الغالب كاريزماتي أو ما يشبهه ..
أو زي نشاطات جذّابة للأطفال والشباب طول الوقت ..
من خلال ناس محترفين في مجالات معيّنة وهكذا!
--

إيه المشكلة في كده؟
المشكلة ان أي هيئة أو خدمة برّه الكنيسة (في وجهة نظري) ..
المُفترَض انها تساعد الكنيسة المحليّة، مش تستبدلها ..
يعني الكنيسة محتاجة قادة، فالهيئة تعمل تدريب للقادة ..
الكنيسة محتاجة رعاية خاصّة، فالهيئة تدرّب رعاة الكنايس ..
الكنيسة محتاجة خبرة في مشورة الجواز، الهيئة تدرّب مشيرين ومشيرات ..
الكنيسة محتاجة خُدّام أطفال، الهيئة تدرّب خُدّام مدارس الأحد ..
وتفضل الهيئة وسيلة مساعدة مؤقّتة، تدرّب وتخدم عشان الكنيسة ..
زي الجامعة اللي بتعلّم الناس عشان تؤهّلهم للشغل ..

مش عشان تستبدل الشغل بيها، أو تخلّي الناس تفضل في الجامعة!
المشكلة ان الهيئة بتتحوّل لمكان بيقدّم المتعة للزباين ..
فالزباين تفضل طول الوقت في المكان من غير ما تكبر أو تفيد كنايسها!
أو زي الدكتور اللي بيحافظ على المريض ..
مريض طول الوقت، بس بأمراض مختلفة ..
عشان يضمن ان المريض يفضل زبون عنده طول الوقت!
--

أنا شخصيًّا معنديش كلام أوجّهه لأي هيئة أو اجتماع من النوع ده ..
لأني مش برتاح لوجودهم بالصورة دي ولا موافق عليه ..
لكن عندي كلام عاوز اقوله للخُدّام وللناس ..

للخدّام ..
أرجوكم ارفضوا أي خدمة في الأماكن دي تحت أي مُسمّى ..
لأنكوا بطريقة غير مباشرة بتساعدوهم يستبدلوا الكنيسة ..
وبيستخدموا شعبيّتكم وأساميكم عشان يجمَّعوا أكبر عدد ..
وتفضل الهيئة مفتوحة والتمويل شغّال ..
وركّزوا خدمتكوا في الكنيسة المحليّة وبقية الكنايس ..
ومع الهيئات اللي بتخدم الكنيسة (ودول كتير بالمناسبة وموجودين)!

للناس ..
أرجوكم ارجعوا لكنايسكم وتعبّدوا فيها واخدموا فيها ..
الكنيسة هي الجسد الحقيقي اللي هيفضل ويكبر ..
حتى لو مكنش ممتع طول الوقت، لأنه مش هدفه يربّي زباين ..
لكن انتوا محتاجين بعض، تكبروا مع بعض، تتعلّموا مع بعض ..

تختلفوا وتتخانقوا وتتصالحوا مع بعض، وتحلّوا مشاكلكوا مع بعض ..
لأن هو ده تعريف العيلة وهدفها، بمميّزاتها وعيوبها وتحدّياتها!
لو حابيّن تتعلّموا حاجة في الهيئات دي، آمين ..
بس تكون فترة مش علاطول ..

وتكون وسيلة لهدف أعظم هو خدمة كنايسكوا مش استبدالها!

قال الرب يسوع المسيح:
"مَن ليس معي فهو عليَّ، ومَن لا يجمع معي فهو يُفَرّق"
(مت٣٠:١٢؛ لو٢٣:١١)
ديڤيد ويصا