ماجدة سيدهم
فيه هجمة كبيرة على الملحدين من أصل مسيحي أي كان مكانهم الجغرافي ..وأغلب الهجمة دي شتايم ولعنات من المؤمنين بزيادة في حين أنهم من أول المهللين لو ملحد من أصل مسلم اعترض على نصوص تراثه أو معتقده ..

والحقيقة الملحد المسيحي معاه حق ..لأنه فكر وسأل وبحث ومالقى إجابة مشبعة للعقل والروح ..فصعب بالعقل والمنطق أنه يصدق قصة ومسيرة المسيح على الأرض وإن فكرة الله ذاتها وفكرة الموت ومابعده مش منطقية خالص وإيه الفرق بينه وبين أي معتقد على تاني الأرض ..؟! (وعن تجربتي )

ومن حقهم يعبروا عن رأيهم والنتيجة اللي وصلوا لها ..وأنت كمان حر تصدق أو ترفض أو تناقش بضج وعلى قدر المسؤوليه  من دون إسفاف أوسطحية ..

* الظريف ..(دي ملحوظة على الهامش ) أن الأخوة الجدد من الدعاة المسلمين  بياخدوا  معلوماتهم  للهجوم الساخر على المسيحية  من الملحدين المسيحين مع طبعا  شوية قراءات لبوستات على بعض مقاطع لأي من الكهنة من هنا وهناك وعاملين فيها جابو التايهة  وبعدين يقولك أهو من جوه كتابهم  ..ماشي ياعم المثقف.. شكرا..

* الكارثة فين بقى ..أن النقد دا بيتم  والبلد بتعاني من صلع فكري وإنساني مرعب ..وأساسا مش مهيئة لوجود ملحدين  ولا مهيئة لأي فكر مختلف  ولا لأي دين غير دين الأغلبية  ولا لأي حاجة خالص ..والمؤمنين بزيادة  على الله حكايتهم

 ودا للاسف بيحول النقاش او الطرح  الديني  المختلف لغضب وشحن النفوس الهزيلة من كلا الطرفين  ليخرج إلى حيز  التنفيذ  من تخريب وكراهية واتساع مساحة التربص والعداوة والرغبة في الانتقام  في اقرب وقت متاح ..وزي مانتو عارفين مشاء الله  الأقباط دايما هم  وش القفص  ..

.يعني كدا  لا عندنا ملحدين ولا مثقفين ولا تنويرين ولا مبدعين ..فيما ندر ..كله محض نزاع وصراع وتبادل الاتهامات والسخرية من بعض ..

طب ماالعالم كله فيه ملحدين وأديان  متعددة في البيت الواحد .. ليه الصراعات  والغباوة عندنا بس ..؟!!!!

.لما يبقى الملحد والمؤمن  في بلادنا  التعسة كل واحد فيهم  شاغل نفسه بسعادته  وبحياته  ومستقبله وتطوير حياته للأفضل بالطريقة اللي اختارها لنفسه وبقناعته  من دون ضرر لأي آخر  نقدر نقول أن فيه أمل نكون بني ادمين أسوياء ..!