كتب - محرر الاقباط متحدون
نسب عدد كبير من الطلاب الناجحين في الثانوية العامة تفوقهم للدين .
وفي هذا الصدد كتب المفكر والطبيب خالد منتصر عبر حسابه على فيسبوك :" تلاوة المنشاوي وعبد الباسط ومحمد رفعت بتطبطب على روحي وبتسعدني لكن ما قدرش أقول انها بتشرح لي منهج الأحياء ونظريات الفيزيا ومعادلات الكيميا !!، أوائل الثانوية العامة اللي كلهم بنفس التصريح وكأنهم في حصة إملاء ، بيقولوا ان القرآن سر تفوقهم .
مع احترامي الشديد لكم ومع احترامي واجلالي للقرآن فيه عوامل تانيه هي سر تفوقكم هل ماخدتوش دروس ولا مجموعات تقوية ولا ذاكرتوا من كتب خارجية ولا شفتم برامج تعليمية ولا كان المدرس اللي وصل لكم المعلومة ذكي ولماح ..الخ ؟؟! .
هل كنتم بتقروا قرآن وبس وعشان كده طلعتوا الأوائل ؟ وهل الطالب فيلوباتير هو كمان حنسمح له يطلع يقول الانجيل هو سر تفوقي؟؟! ونبقى في مباراة مالهاش نهاية !!!.
والله يا جماعة أنا باناقش بالمنطق قبل ما تتهموني بكل التهم الجاهزة من زندقة وهرطقة …الخ
سؤال ساذج ومشروع، هل سر تفوق علماء نوبل كان هو نفس السبب وحنسمع من علماء اليهود ان التوراة سبب تفوقهم ومن العلماء الملحدين ودول كتيييير ان كتب نيتشه هي سبب تفوقهم؟؟.
هل مافيش حد ساقط ثانوي كان بيقرا قران زيهم؟؟، هل تفوق جامعات العالم على جامعاتنا بسبب ان الطلبة هناك بيقروا القرآن ؟!! بلاش تعرضوا القرآن لحاجات نسبية مالهاش معايير محددة عشان ده بيضر بالقرآن والدين لان اللي حيقراه ويسقط حيشك فيه وبعدين انت عايز ايه م التصريح ده وايه غرضك؟؟ تدخل الناس في الاسلام مثلاً وتقنعهم بانك البريمو؟! بأقول لك وباطمنك احنا كتير قوي وبشكل زياده عن اللزوم ومش محتاجين كماله ولا زياده ، احنا بس نخلي المسلمين اللي موجودين بالفعل قوة فعاله وبعدين يحلها حلال لنطمح في المزيد.
