د.امير فهمي زخاري المنيا
هو إيه العلاقة بين البيض و الشيبسي و الدهانات؟
كلنا عارفين إن أغلب الأكل بيكون فيه مواد حافظة وعارفين إنها مضره بس مكبرين دماغنا وبنقول خلاص هنعمل ايه مجبرين.
بس يمكن سبب سكوتنا إن أحنا معندناش معلومات كفاية عن خطورة المواد دي واضرارها علي جسمنا فبناكل وخلاص وإحنا مغلوبين علي أمرنا.
انا دورى الاقي المواد دي و اوعي الناس علي خطورتها، و النهاردة لقيت لكم مادة موجودة في أكل كثير من أكلنا و حبيت اقول لكم عنها بشكل مفصل وايه استخدماتها واضرارها علي جسمنا وهي مادة:
Sodium Metabisulphite بيروكبريتيت الصوديوم .
المادة دي بتستخدم في الحفاظ علي الأكل المجفف زي الشيبسي والكاراتيه والزبيب والعصاير المركزة.
بس الغريب إن بردو بتستخدم في صناعة الدهانات و الاساتك وصناعة الورق.
و الاغرب انه معظم جهات معاير الأمن والسلامة الغذائية معترفين بخطورة هذه المادة ولكن بدلاً من منعها حددوا نسب استخدامها في الغذاء، ده يرجع يمكن لأن المادة دي مادة هامة في الحفاظ علي الصناعات الغذائية والتعليب، المشكلة انه مع تراكم المادة دي في أجسامنا بتبدأ تظهر ردود فعل مثل التهابات المعدة او التهابات العين او أزمات الربو او الطفح الجلدي او حساسية بأنواعها… ،
السؤال بقي هيعرف إزاي المصنع و الجهات الأمنية دي أنا أكلت كام كيس شيبسي علشان أكون عديت النسبه المسموح بيها ولا لأ ؟
و أنا أعرف منين المصنع حط قد ايه في الكيس الواحد وهو مش مكتوب على الكيس المقادير لأن نفس الجهات دي بتحميه من إنه يحط وصفات التصنيع الخاصة به ، يعني لا هو عرف ولا أنا عرفت.
طيب إزاي بقى نلاقي المادة دي في أكلنا ؟ أول حاجة لما تفتح أي كيس أو علبة شمه شوف لو في ريحة شبه ريحة البيض، لو لقيتها أبدء دور علي حاجة من الأسماء دي
E223، Sodium Metabisulfite, Sodium Pyrosulfite, Sodium Salt Pyrosulfurous Acid, Sodium Salt Disulfurous Acid,
Sodium Disulfite, Disodium Disulfite.
و متنساش لو لقيت في اي منتج بيحتوي على أي حاجة من المواد دي بلاش منه..
نصيحه مافيش احسن من الاكل الطازج .. صحى ومفيد ..
اتمنى لكم الصحه والعافيه وللحديث بقيه ..
د.امير فهمي زخاري المنيا
