د. أمير فهمي زخارى المنيا
اختيار الوقت المناسب للمحادثة مع الزوج وعدم استجابة الزوج لطلبات الزوجة وتوجيه الاتهام بالمبالاة وعدم الاهتمام بها
تكلمنا في الجزء الأول عن " فن الكلام بين الزوجين - رغى الزوجة وطبيعة الرجل"
تكلمنا في الجزء الثاني عن " خروج الزوجين للتسوق"
تكلمنا في الجزء الثالث عن " دورة الرجل العاطفية الشهريه وانطوائه".
في الجزء الرابع ها أتكلم عن " اختيار الوقت المناسب للمحادثة مع الزوج وعدم استجابة الزوج لطلبات الزوجة وتوجيه الاتهام بعدم المبالاة وعدم الاهتمام بها "
من الأمور اللي بتتعجب منها الست هو إنها بتقدم لجوزها الكتير وبتضحي علشانه، لكنها يصيبها الذهول والصدمة لما تطلب منه حاجه يعملها لها ولكنها تلاقيه فجأة صرخ في وشها وزعق ورفض، مع إنه ربما يكون طلب بسيط ومش هياخد من وقته دقايق.
واللي ما تعرفهوش الست عن الراجل بإنه لما بيكون بيعمل حاجه بيبقى مركز فيها قوي قوي، وأي شيء يشوش عليه فده بيثير أعصابه وبيتوتر ويزعق حتى لو كان بيحبها موت. علشان كده يا ست هانم ما تطلبيش منه أي شيء حتى لو متهيأ لك إنه منهمك في شيء في نظرك تافه.
ودايماً الست بتنتظر من جوزها إنه يكون الفارس الهمام اللي لازم يعطف عليها ويتأثر بشكواها، ولكنها أحياناً تفاجأ بأنه كتير يقول لها إن الموضوع اللي مكبراه ده هو موضوع هايف وتافه ومفيش داعي للقلق والتوتر. فيجي في بالها بعدم المبالاة منه ولا يهتم بيها.
وهنا بالتصرف ده بيقولها ما تشيليش الهم وأنا قادر على حل أي مشكلة حسب قدراتي واعتمدي عليا. وده رد منطقي عند الرجالة عادة، وكمان بيطمنها إنها قادرة على حل أي مشكلة برضه.
وهنا نلاقيها تحزن وتزعق وتقوله انت مش هامك الموضوع ولا عاوز تساعد في حل المشكلة معايا. وهنا يتعصب الراجل ويزعق ويتنرفز بسببها.
من طبيعة الست إنها بتحب تاخد رأي جوزها في لبسها لما تكون خارجه أو يكونوا خارجين مع بعض. أنا حلوه كده؟، أنا شيك باللبس ده؟، مش أحلى من فلانه وفلتكانه؟. كمان لما جوزها يقولها اللبس ده مش حلو أو مش مناسب للخروجه دي. فبيلاقيها بسرعه غيرت اللي لابساه، وقالتله إيه رأيك في ده ولا ده ولا ده أحسن؟ كمان لما بتكون بتتكلم بطريقه معينه أو بتضحك ضحكه مش عجباه وينبهها عليها، فبتاخد بالها في المرات اللي جاية.
لكن لما تقوله اللبس ده مش حلو عليك وغيره، فتلاقيه بيعاند وما بيغيرش وبيعتبر ده تحدي لشخصيته ويفضل طريقة لبسه حسب مزاجه هو، فبيقاوم.
فمن طبيعة الراجل هو إنه يكفيه أن يكون مقبول عندها، وده بيريحه، ولذا موضوع التغيير عنده شيء مش حساس بالنسبة له وما يهتمش بيه.
شخصية الراجل وطباعه تختلف عن شخصية وطباع الست عموماً، وتبقى غلطانة لو اعتقدت إن طباعه لازم تكون زي طباعها.... للأسف مشاكل كتيره بتحصل بينهم نتيجة الاختلافات دي.... تصرفات بتحصل من جوزها ومش لاقيه ليها تفسير منطقي.... يارب أكون قد ألقيت بعض الأضواء عليها... تحياتي
في المقال الخامس من طباع الرجالة "للزوجات فقط.. نصائح وإرشادات لاستعادة الحب وإنعاش الحياة الزوجية"
د. أمير فهمي زخارى المنيا
