د. أمير فهمى زخاري المنيا
السؤال الشائع..
هو انا كمريض سكر ينفع احلي بعسل نحل بدل السكر ؟
و عشان أجاوب على السؤال ده صح ، تعالوا معى أوضح لكم اولا الفرق بين السكر الأبيض وعسل النحل...
👈اولا السكر الأبيض واسمه العلمي "سكروز"، هو عباره عن مركب بيتكون من جزيئين: واحد جلوكوز والتاني فركتوز، لما بيدخل جهازك الهضمي بيتكسر ، فبيدخل الجلوكوز والفركتوز بتوعه مباشرة للدم، و بيرتفع طبعا مستوى الجلوكوز في الدم بسرعة، وده بسبب إنه بيمتص بسهولة وسرعة كبيرة، وعشان كده البنكرياس بيضطر يفرز كمية كبيرة من الأنسولين عشان يساعد الجسم في استخدام الجلوكوز ده أو تخزينه.
بس خد بالك لمريض السكر، الاستجابة دي ممكن تبقى مشكلة، لأن الجسم غالبًا مش قادر يستخدم الأنسولين بكفاءة، فبيحصل ارتفاع كبير في مستوى السكر.
و علي فكره السكر الأبيض مفيهوش أي فوايد غذائية تقريبًا، يعني نقدر نقول انه عبارة عن سعرات حرارية علي الفاضي ، يعني بيديك طاقة من غير أي فيتامينات أو معادن أو مضادات أكسدة.
👈ثانيا: بالنسبه لعسل النحل ، فهو كمان بيحتوي على خليط من الجلوكوز والفركتوز زي السكر الأبيض، لكن بنسب مختلفة.
بس ميزه العسل انه بيحتوي على كميات صغيرة من الفيتامينات والمعادن زي فيتامين C والحديد والماغنيسيوم، وكمان مضادات أكسدة زي الفلافونويدز.
و العسل بردو بيرفع مستوى الجلوكوز في الدم، لكن تأثيره ممكن يكون أبطأ شوية من السكر الأبيض بسبب وجود بعض الألياف البسيطة والمواد المغذية اللي ممكن تقلل من سرعة الامتصاص.
لكن ده مش معناه إنه آمن لمريض السكر ياخده بكميات كبيرة، لأنه في النهاية بيحتوي على سكريات مركزه،
لكن طبعا
العسل فيه فوائد غذائية مش موجودة في السكر الأبيض، زي الفيتامينات والمعادن ومضادات الأكسدة اللي ممكن يكون ليها دور في تقليل الالتهابات وتحسين صحة الجهاز المناعي.
لكن اوعوا تنسوا ان العسل غني بالسعرات الحرارية، ولو استخدمته بكميات كبيرة ممكن يرفع مستوى السكر في الدم ويزود كمان الوزن...
👈طيب الخلاصه أيهما أفضل لمريض السكر؟
العسل ممكن يكون اختيار أفضل من السكر الأبيض لو هتاخده بكميات صغيرة جدًا، لأنه بيديك شوية فوايد غذائية. لكن الفرق في تأثيرهم على السكر في الدم مش كبير. يعني، لو بتحاول تتحكم في مستوى السكر، الأفضل تقليل استخدام الاثنين بقدر الإمكان.
ونظرًا لأن نكهة العسل أحلى من السكر الابيض، فيمكن استخدام كمية أقل من العسل بدلاً من السكر في بعض الوصفات...
فلو هتاخد عسل، خلي الكمية صغيرة جدًا، مثلاً نص معلقة صغيره و دايما تابع مستوى السكر في الدم بعدها، و السكر الأبيض الأفضل إنك تقلله جدًا أو تستبدله بمحليات طبيعية خالية من السعرات الحرارية زي الستيفيا لو حبيت.
اتمنى لكم دوام الصحه والعافيه...تحياتي.
د. أمير فهمى زخاري المنيا
