اعرف معنى كلامك قبل ما تقوله...عامل إيه يا فلان "100 فل و 14"، الحمد لله ، "الآشيه معدن"

وإيه معنى كلمه الآشيه ومعنى كلمه معدن يعنى معدن حديد والا ذهب ...

دة موضوع مقالنا اليوم...

100 فل و14، المصرى القديم عندما كان بيرسم على جدران المعابد والمقابر ، كان بيقسم الجدار لشبكة مربعات وكان بيرسم الإنسان الكامل في 114 مربع...

بمعنى طول الإنسان بعدد 100 مربع وعرضه بعدد 14 مربع ... فلما نقول 100فل و14 يعنى انسان بكامله فل...

أما الحيوانات اللي زي الكلب مثلا فكان بيرسمها فى 60 مربع.

6مربعات × 10مربعات = 60 اى كلب كامل...

 

عامل إيه؟

(الحمد لله 100 فل و 14).

تصدق فلان ده نصب عليا!

ده (فلان ده إبن 60 كلب)

نيجي بقه لباقي العبارة:

 كلمة "الآشيه" يعني الصحة ، كان زمان بيتقال على الصحة "آشيه" ، حتى مادة العلوم في المدارس الإبتدائي كانت "علوم وآشيه" ، يعني علوم وصحة..

و(الأشية معدن) معناها أن القشة عندي معدن , اى انا فى خير حال ,وأصله القشه معدن فتم تحويل القاف الى همزه فاصبح المثل الأشَّة معدن , ولما كان الحرف المشدد (اى المتماثل = ش ش) ثقيلا في النطق , خففت العامه الحرف الثانى منهما الى ياء وهو قانون صوتى يعرف بالمخالفه الصوتيه إلى القشة بعد أن تم تحريفها لتكون العبارة القشة معدن، أى القشة الضعيفه الهينة صارت قوية وصلبة وهذا يعنى الرضا.

 

وكلمة "معدن" ، مش معناها حديد ولا معادن خااااالص ، دي كلمة من اللغة المصرية القديمة ، فكلمة "معدن" مصدرها كلمة "مدن" في لغتنا المصرية القديمة ، وكان معناها "هادىء" أو "مرتاح البال" 

 

وبقت عبارة مصرية خالصة ، "الآشيه معدن" يعني الصحة تمام.

 

عرفتوا دلوقتي معنى الكلام قبل ما تقوله...تحياتى.