محمد طه
اللى بيخوض رحلة الوعي والنمو النفسي والروحى.. بيجي عليه وقت ويحس إحساس غريب جداً..

هو مش احساس بالغربة أو الاغتراب.. لكن إحساس بعدم الانتماء لكل ما هو قديم..

خلاص مابقاش منتمى لطريقة التفكير دى.. مابقاش منتمى لشكل التصرفات ده.. مابقاش منتمى لمجموعة الناس دول ولا دول ولا دول..

وكأنه اقتلع جذوره من كل مكان كانت مزروعة فيه.. اقتلعها بإيده وبإرادته وبخاطره..

اللى بيسافر لفترة طويلة ويبعد عن المكان اللى اتولد وكبر فيه.. بيحس احساس مشابه.. وأحياناً يبقى متلخبط..

جذورى فين؟ هل هى فى المكان اللى اتولدت فيه؟ والا فى المكان اللى عشت فيه؟ والا خلاص مالهاش وجود؟

اللى بيعدى بخبرة نفسية صعبة أو مؤلمة.. خاصة فى العلاقة بأهله أو أصدقاءه أو حبايبه.. بيتسائل نفس الأسئلة: هو أنا جذورى فين؟ هو أنا ليا جذور؟ هو أنا لسه ليا جذور؟

أقولك يا سيدى..
الجذور مش بس فى مكان الولادة والمعيشة.. مش بس فى مكان معين.. قريب أو بعيد..

فيه نوع آخر من الجذور.. أعمق وأقوى وأطول عمراً..

جذور طويلة وممتدة.. جوا الناس اللى بيحبوك..

كل حد بيحبك حب حقيقي وصادق.. انت ليك جواه جذور..

كل حد بيفتكرك ويستحضرك أثناء غيابك.. انت موجود جواه وليك جذور..

كل حد بتوحشه ويفتقدك ويهفو للقاءك.. انت زارع جوا نفسه وروحه ليك جذور..

الجذور الحقيقية.. مكانها جوا الناس اللى بتحبنا..

وجودنا الداخلى فيهم..
ثباتنا واستقرارنا فى وعيهم..
ارتباطهم النفسي والروحى بينا..
ده المقر الأصيل للدفا.. وللونس.. وللجذور..

فى فيلم (Coco) العبقرى.. اللى خاض بطله الشاب الصغير رحلة مثيرة فى عالم الأموات.. اتقال جملة بديعة: "عندما لا يتذكرك أحد فى عالم الأحياء، فأنت تختفى من هذا العالم أيضاً، ونسمى هذا الموت الأخير"..

لما يبطل حد يفتكرك بالخير.. كده انت مالكش جذور..
لما تُنسي من الذاكرة.. ومايبقاش ليك أثر.. فأنت فقدت جذورك..
لما يصبح وجودك كعدم وجودك.. فقل على جذورك السلام..

يا من خضت الرحلة..
طول ما فيه حد بيحبك.. ويفتكرك.. وبتوحشه..
طول ما فيه حد بيودك.. وممتن ليك.. وبيقدرك..

فاتطمن.. جذورك موجودة.. وعميقة.. وممتدة..  
محمد طه