الشجاعات لم يخلقن للهزيمة

 بمناسبة  شهر أكتوبر الوردي  أكتب  لكل الستات  خاصة   العظيمات الشجاعات اللي انتصروا أو مازالو في رحلة الانتصار على السرطان ..  

 

الحبيبات الغاليات .يمكن كلامي مش جديد لكن حابة أحكي معاكو شوية ..وعن تجربة ..صحيح السرطان خاصة سرطان الثدي  من أشهر وأخطر الأمراض المزعجة  والمنتشرة بالعالم  إلا أن فعلا الشفاء منه أكيد خاصة مع  الاكتشاف المبكر ومع التقدم الكبير اللي حققه وأكده العلم في السنوات الأخيرة في المجال دا.. فلا داعي للخوف أو القلق إطلاقا..

  ..

رجاء  ياستات ويابنات  رجاء .. الفحص الدوري على الثدي والرحم  مهم جدا .. دا مش رفاهية ..دا  وعي و ثقافة وحماية  لينا  ومسؤولية  تجاه أ نفسنا وبيوتنا  واحترام لحياتنا  علشان دا حقنا نعيشها بكفاءة ..

 

انتبهوا ياحلوات ..الإحساس بأي ألم أو وخز  فجأة أو بأي عرض غريب  دا  بيكون مؤشر للإنتباه بأن فيه شيء غلط بيحصل في جسمنا ..فالتهاون معاه  على أنه مجرد  إحساس عابر  وهايعدي  أو ناخد مسكن وهانكون تمام  أو نأجل الكشف  لأن عندنا أولويات أهم ..احنا كدا  بنهمل  في حق صحتنا وحق اللي يهمونا  وممكن بضيع  علينا فرص  أفضل للعلاج والشفاء  المؤكد ..

 

  الحالة المعنوية الحلوة هي أهم سلاح للوقاية والشفاء من  السرطان ..لأن فعلا الهموم والقلق  واليأس والحزن  بيضعف المناعة كتير وبيخلي الجسم عرضه لإستقبال أي شيء يخالف  نظامه الطبيعي  ..

 

الدعم النفسي  الأسري مهم أوي ..لأن من لحظة ما المريضة  بتعرف أنها  مصابة بالسرطان كل شيء في لحظة  بيتلخبط  تماما  والحسابات بتختلف وكل التفكير بيكون سلبي (خلاص دي النهاية ) و بياخد إتجاه  مرتبك  ونفكر إزاي نحمي أسرنا  ونطمئن على أولادنا .. 

   ولكن  ياحبيبات.. لو حصل لبعضنا  ولم  يتوفر  هذا الدعم الأسري  أو العائلي تحت أي  ظرف و خاصة لو كنتي من دون زوج  وفي المواجهة الأمر  بمفردك ..ودا بيحصل كتير جدا  للأسف(حكايات كتير مؤلمة ) .. ف هنا أرجوكي ياست البنات ياجميلة  خليكي شجاعة وقد المسؤولية..وخدي القرار.. واستعيدي تركيزك واعملي  فورا  وقفة بدون أية مجاملات ولا  اعتبارات .وابعدي تماما عن كل من يسبب لك ولبيتك أي ضرر نفسي بكلام سلبي  

 لأن دي حياتك و انتي اللي تدافعي عنها ..

  

 فتشي جواكي   وخرجي طاقة  التحدي والبهجة اللي ماكنتيش واخدة بالك أنها جواكي واعتبري الواقع الجديد اللي طرأ عليكي فجأة أنه تحدي  ولازم تكسبيه ..أيوه  نقدر..

 

دي معركتنا  اللي لازم نكسبها  وأولادنا  كمان لازم  يكسبوها  معانا ..و مادام الواقع فرض علينا نعيش تفاصيل  التجربة  يبقى لازم نعيشها  بشجاعة ..ومافيش بديل غير الانتصار   ..

 

اهتمي  ياحبيبة  بنفسك وبصحتك  وبنفسيتك وبزينتك .يعني دعمي نفسك بنفسك ..حتى لو اتغير شكلك تماما عادي جدا .. كوني  فخورة بنفسك وأنك حد  مميز (لأن فعلا إحنا ممتازين و مميزين ) .صدقيني بتفرق ..لما تلاقي نفسك أنت اللي بتدعمي  اللي حواليكي وبتشجعيهم خاصة في مرحلة الكيماوي وتدعمي مريضات غيرك  ..هتحسي  كل يوم  أنك بتحققي انتصار  فعلي .. أنتي فعلا كدا بتهزمي المرض  وبتسخري منه كمان  .. 

 

 ثقي أن إلهك هو السند المحب  واللي حاسس بيك أوي أكتر  من أي حد   ومقدر مخاوفك واضطرابك ..انتبهي لصوته الطيب  بأن كل تجربة بنمر بيها  هي رسالة فهم خاصة  منه  لينا .. رسالة أعمق وأجمل وأقوى لبداية جديدة  متعافية .. 

 

رسالة .. ياريت  يكون بكل مركز طبي للأورام  على مستوى البلاد  قسم خاص  ومتخصص  يهتم  بالدعم  المعنوي  للمريض وأسرته .. دا  بيفرحه  وبيطمنه  وبيساعده على التخطي والتعافي بإرادة أقوى و نفسية  أجمل ..

رسالة تانية لبعض الناس ..اياك والكلام المزعج والسلبي لمريضة السرطان  او لاولادها  لانك كدا انت قاتل نفس وسبب مباشر للحزن

 

 و في الأخير ..شكرا  لكل  من هم في رحلة المقاومة   والإصرار على التجاوز والانتصار على السرطان ..كبار أو أطفال صغيرين  لأنكم   بتكونوا فعلا   مصدر دعم وإلهام  لكثيرين  وسبب في تغير حياة ناس تانية بنظرة أبسط  و أعمق  للعطاء وللحياة ....

 

شكرا لينا إحنا  الستات الشجاعات  المقبلات على الحياة بكل  البهجة  رغم  أي شيء..  (جميل نشكر نفسنا ) 

 

الحياة مش  بس حلوة  لكنها تستحق  نعيشها من غير ألم  أو ضغط عصبي..

 الله يمتعكم بالصحة والحيوية والسعادة  .. 

 لمحة من تجربتي ..

(  أكتوبر  الشهر الوردي العالمي  للتوعية ضد سرطان الثدي )