د. أمير فهمي زخارى
هاتكلم فيها عن مقاومة الانسولين واسبابه واعراضها اللي بيسبب امراض خطيرة تصيب معظم الناس زي (السكر من النوع التاني، تكيسات المبايض، الكبد الدهني، إرتفاع الكولسترول، التهاب المفاصل..)
وللأسف قليل جداً اللي بياخد باله منها حتى زملائي الأطباء مع كامل الاحترام...
في الجزء الأول ها نعرف:
- ما هو الفرق بين مرض السكري ومقاومة الانسولين؟
- يعنى ايه مقاومه الأنسولين؟؟
- هل السكر هو المسؤول عن "الخلل الهرموني" المسبب لزيادة الوزن؟
- ما هو تحليل مقاومة الإنسولين الـ Homa ir؟
- 6 أسئلة لو جاوبت على واحد منهم بـ "نعم" يبقى غالبًا عندك مقاومة إنسولين.
- ما هو الفرق بين مرض السكري ومقاومة الانسولين؟
"مقاومة الأنسولين" هو إحدى مقدمات الإصابة بمرض السكري والذي يتحول مع إهماله من كونه مجرد سبب إلى عامل خطر يسبب الكثير من الأمراض الأخرى ولفهم طبيعة هذا المرض يجب أن تتعرف على أسبابه وبدايته حتى تتمكن من اكتشاف اعراضه التي تمنحك الفرصة للسيطرة عليه قبل أن تتزايد مضاعفاته فكما يقال "الوقاية خير من العلاج"
- يعنى ايه مقاومه الأنسولين؟؟
أنا ها أقولك:
هي عدم قدره الأنسولين على ادخال السكر الموجود في الدم جوا الخلايا العضلية ... ببساطه كده دى خناقه دايره بين هرمون الأنسولين والعضلات، بأن هرمون الأنسولين مش قادر يدخل السكر جوا العضلات علشان العضلات قافله الباب... طب وبعدين...
نكمل.. يبدأ البنكرياس يتعصب ويتنرفز ويبدأ يفرز أنسولين أكتر وأكتر وأكتر في محاوله منه لفتح بوابه الخلايا العضلية ليدخل السكر اللى موجود في الدم...
طب يا ترى بيقدر يفتح البوابة؟؟؟
آه بيقدر يفتحها مره واتنين وتلاته... لكن كل مره بيفتح فيها البوابة بالعافية، كل ما البوابة بتقفل أكتر مما كانت قافله قبل كده... وده اللى بنسميه مقاومه الأنسولين..
نكمل اللى ها يحصل بعد كده..
.
معنى بوابه الخلايا العضلية بتقفل، ان السكر بيبتدأ يتخزن على شكل دهون بشكل كبير (وده الترجمة الحقيقية للكلمة اللى بنقولها دايما أننى بتخن رغم ان اكلى ضعيف وما فيش اى نوع رجيم نافع معي) ...
وكمان علشان السكر مبيدخلش جوا الخلايا العضلية وبناءا عليه معندكش طاقة ومش هتقدر تعمل أي حاجه (وبرده ده الترجمة الحقيقية لمعنى أنا تعبان علطول، أنا مش قادر أبذل أي مجهود).
هل السكر هو المسؤول عن "الخلل الهرموني" المسبب لزيادة الوزن.
هرجع أفكركم تاني إن السكر الأبيض هي السبب الأساسي.
السكريات بترفع السكر الخارج من الكبد مرة واحدة في الدم بكميات كبيرة، ودا اللي بيزعل العضلات ويجبرها تقفل الباب في وش الأنسولين، ومن هنا بيحصل "الخلل الهرموني" اللي بيغير عمل هرمونات الجسم كله منها زيادة هرمون الجوع وتقليل الشبع؛ وبكدا الأكل هيتحول لدهون بدل ما يبني عضلات.
مقاومة الأنسولين مش بس بتزود الوزن، دي بتمثل 70% من أسباب أمراض التمثيل الغذائي (سكر من النوع التاني، كبد دهني، تكيسات مبايض، إرتفاع ضغط الدم والدهون الثلاثية.)
ممكن وزننا ينزل لما نقلل نشويات ونأكل فاكهة، بس بنسبة 90% هننزل مياه وعضلات وأول ما نوقف دايت وزننا هيزيد تاني لأننا متجاهلين السبب وبنعالج العرض.
تحليل مقاومة الإنسولين الـ Homa ir
خد بالك إن نتيجة التحاليل دا خدعه ليك، لأنه بيثبت بس مش بينفي يعني لو تحليل مقاومة الإنسولين الـ Homa ir طلع سلبي مش معناها إن مفيش مقاومة إنسولين؛ لازم الدكتور يربط ما بين اللى هو شايفة واللى موجود في التحليل.
6 أسئلة لو جاوبت على واحد منهم بـ "نعم" يبقى غالبًا عندك مقاومة إنسولين:
1- تراكم دهون في المنطقة السفلية من البطن.
2- بتتخن رغم ان أكلك خفيف وقليل.
3- عندك سمار في الرقبة من الخلف.
4- تراكم دهون في منطقه الصدر وتثدى (كبر حجم الثديين) في الرجال.
5- تراكم للدهون في منطقه الذراعين والظهر بعدما تراكمت في البطن.
6- وجود زوائد جلديه وخصوصا في الرقبة والوجه.
وللحديث بقية ... في الجزء الثاني هاتكلم عن:
- ما هي اسباب مقاومة الانسولين؟
- ما هي طرق تخفيف مقاومة الانسولين؟
- الطرق الثلاثة لعلاج مرض مقاومه الأنسولين.
- التغييرات على نمط الحياة هي العلاج الأساسي لمقاومة الإنسولين.
- ما العلاقة القوية بين مرض مقاومه الأنسولين وضعف الخصوبة عند الرجالة والستات؟
أتمنى لكم الصحة والعافية... تحياتي.
