ميرڤت خير
زمان كنت أستغرب من نهايات بعض العلاقات .
أقول ليه انفصلوا بعد المده الطويلة دى ؟؟!!
و مثلاً أصدقاء العمر اللي بيقاطعوا بعض ومحدش قدر يقنعهم ترجع علاقتهم مع بعض زي الاول.
والأقارب والجيران وأحيانا حد من الأهل .
فضلت استغرب لحد ما وصلت لحقيقة إنه في كل االعلاقات دى كان فيه حاجة أسمها "الرصيد"
علاقاتنا بالناس مرهونة برصيد بيتحدد حسب مَعزّة الشخص ده عندنا وكل ما التعامل كان راقي ومحترم الرصيد بيزيد والعكس صحيح .
كل ما التعامل كان سيء وغير لائق الرصيد بيقل .
ومع إحساس البعض إننا بنحبهم أكثر يستمروا بالتصرفات الغير مرضية غير مدركين إنهم يسحبون من رصيد العشم والمحبة اللي ليهم عندنا وبيعتقدوا إن رصيد التسامح اللي ليهم عندنا ممتد بلا نهاية .
وطبعا العلاقة بتستمر لحد ما الرصيد يبقى صفر .
لكن في حالات إستثنائية بنقرر نعيد شحن الرصيد ونضطر نغفرلهم أخطائهم ( عشان فى ناس بتحب تمرمط نفسها بمزاجها ) حتى يرجع يتمادى الشخص مره تانية ويسحب رصيده مرة تانية .
هنا إحنا بنكون فقدنا قدرتنا على التحمل بعدها بيبقى قرار قطع العلاقة قرار قادرين على اتخاذه بكل ثقة وتأكد وبدون تراجع.
ببساطة لأنه بيكون قرار مافيهوش ندم خلاص .
هو ده حال الناس دلوقتى .
حافظوا على علاقاتكم وعلى الناس اللي بتغفر لكم وبتسامح كتير .
ولا تعتقدوا إن المدة الزمنية أو طول العلاقة أسباب كافية لاستمراريتها .
زودوا رصيدكم بالمودة و الرحمة والحب والإهتمام .
كلما كثرت تجاربنا في الحياة صغرت دائرة علاقتنا مع من حولنا .
ليس تكبراً ابداً بل لأن التجارب تمنح الإنسان معايير أكثر دقة لإنتقاء الأشخاص .
