د. أمير فهمي زخارى المنيا
كنت باكتب في مقال سابق عن أصل اسم طبق السلطة ووقفت عند معلومة فساد طبق السلطة وطبقته على حياتنا... تعالوا معي نقرأ هذا المقال وأتمنى أن ينال اعجابكم...
لو قطعت جزاريه وطماطمايه وقرن فلفل وشوية بقدونس والذي منه وعملت طبق سلطه مُعتبر..
طبق السلطة ده لو إنت سبته ف التلاجه يوم او إتنين هتلاقيه حلو.. مجارلوش حاجه.. هيحافظ على صلاحيته فتره طويله.. لكن لو حطيت عليه شوية ملح يبقي لازم تاكله بعد ساعة او ساعتين بالكتير وإلا هتلاقي الطماطم بقت طريه والسلطة إتعجنت وطعمها بقي بايخ ومؤذى.. ده كلام علمي بقولهولك عن تجربه على فكره ...
عاوز اوصلك إنك عامل زي طبق السلطة بمكوناتك اللي ربنا حطها فيك صلاحيتك تمام.. طول ما إنت لحالك بدون إضافة " ملح " والملح يعني الناس.. سواء بقي " حبيب.. صاحب.. معرفه. " إنت ف السليم..
- كتير تلاقي واحده كانت عايشه زي الفل واول لما يدخل حياتها حد تآمنلُه وتحبه وتثق فيه للأسف يكسرها ويغُمها ويندمها ع اليوم اللي ارتبطت فيه..
- واحد يكون مرتاح البال واول لما يصاحب واحد ويعزه ويدخله بيته يغدر بيه! فيخليه للأسف ميعرفش من بعدها يثق في حد..
طبيعي نتعامل مع الناس.. لأنهم بيكملونا.. بس ياتري الناس دي تستاهل تضاف لحياتك؟
طبق السلطة عمره ما يقول للخيار او الجزر او البصل او الخس لأ.. لأنهم بيضيفوله ويخلوه حلو.. لكنه يقلق من الخل والملح ويكون حريص إن الكمية اللي تضاف منهم ليه متكونش كبيره.. فديمًا تعاملك مع الناس اللي تقلق منها خليه طفيف ومحدود، وتكون حريص إنك تختار اللي هيدخلوا حياتك وتثق فيهم شكلهم إيه.. لأنهم مع الوقت هيتحكموا في مزاجك ونفسيتك..
مثلاً: سأل عليك تفرح.. أهمل في السؤال تكتئب! وفي بوعده معاك تفرح.. خلف كلمته ومنفذهاش تتصدم وتزعل!.. ف إطلب من ربنا يوقعك في الناس الصح..
- سيدنا علي كان ديمًا يدعي ويقول: اللهم إني أعوذ بك من الناس.. يارب مش عاوز اختلط بالناس نهائي! النبي غضب وقاله: بل قل اللهم إني أعوذ بك من شرور الناس.. احفظني يارب من الناس الشر اللي يوجعوا القلب ويبوظوا السعادة ويخلفوا الوعد ويخونوا العيش والملح..
- ومن آيات القرآن التي تتحدث عن الصداقة قوله تعالى: (وَمَا أَضَلَّنَا إِلاَّ الْمجْرِمون* فَمَا لَنَا مِن شَافِعِينَ. وَلا صَدِيقٍ حَمِيم* فَلَوْ أَنَّ لَنَا كَرَّةً فَنَكونَ مِنَ الْمؤْمِنِينَ. إِنَّ فِي ذَلِكَ لآيَةً وَمَا كَانَ أَكْثَرهم مّؤْمِنِينَ)، سورة الشعراء الآيات من 91 إلى 103.
- كما نقل عن الرسول في حديث صحيح شريف أنه قال: (مثل الجليس الصالح والسوء كحامل المسك ونافخ الكير فحامل المسك. إما أن يحذيك وإما أن تبتاع منه وإمّا أن تجد منه ريحاً طيبة ونافخ الكير إمّا أن يحرق ثيابك وإمّا أن تجد ريحاً خبيثة).
ومن كلمات الكتاب المقدس:
- “طُوبَى لِلرَّجُلِ الَّذِي لَمْ يَسْلُكْ فِي مَشُورَةِ الأَشْرَارِ، وَفِي طَرِيقِ الْخُطَاةِ لَمْ يَقِفْ، وَفِي مَجْلِسِ الْمُسْتَهْزِئِينَ لَمْ يَجْلِسْ. “(مز 11)
- مَنْ يُكْثِرِ الأَصْحَابَ يُخْرِبْ نَفْسَهُ، وَرُبَّ صَدِيقٍ أَلْزَقُ مِنَ الأَخِ. أَمْثَالٌ ١٨:٢٤
- الْمُنَافِقُ يُثِيرُ الْخُصُومَاتِ، وَالنَّمَّامُ يُفَرِّقُ الأَصْدِقَاءَ. أَمْثَالٌ ١٦:٢٨
- لا تَنْقَادُوا إِلَى الضَّلالِ: إِنَّ الْمُعَاشَرَاتِ الرَّدِيئَةَ تُفْسِدُ الأَخْلاقَ الْجَيِّدَةَ! كُورِنْثُوسَ ٱلأُولَى ١٥:٣٣
من الآخر إستنضف، واللي تلاقيه هيمرر حياتك تجنبُه " إعتزل ما يؤذيك " وادعي ربنا إنه يكفيك شر الناس اللي في وشك مرايه وف ضهرك سّلايه.. وماتنساش تحط ملح وخل للسلطة قبل تقديمها مباشره... وابقوا افتكروا كلام المقال وانتوا بتحضروا السلطة... تحياتي.
د. أمير فهمي زخارى المنيا
