د. أمير فهمى زخارى
وهل لهذه الكلمات أصل في اللغة العربية؟
(- أمّال - أحا - الأتم - شاريك )...
* نيجى للكلمه الاولى وهى : "أومال"
سأحاول ان اشرح ما تعني من بعض الاستخدامات…
+عبده ده اجدع واحد في المنطقة.
= أومال!
+انا لن اسكت على اهانته لي!
= اومال انت ناوي تعمل ايه؟
ومن هذه الاستخدامات اقرب معنى استطعت ان اصل اليه لكلمة اومال (والتي عادتاً يتبعها كلمة ايه) هو : "اذا لم يكن هذا، فماذا؟" (وقد تستخدم بجدية او سخرية).
ومعنى تانى لكلمة اومال هى تخيير بين شئ وشئ اخر مثل يقول لك استفسار انت ضيف عندنا اومال انت صاحب بيت والمعنى يقصد انك مش ضيف بل انت صاحب بيت ومثال عام عادت تستعمل فى المجامله.
* نيجى للكلمه التانيه وهى: "أحا"
امثلة :
الاول : تعرف انهم عملوا غرامة على كل واحد يمشي في الشارع؟
الثاني : احا ازاي كدة ؟
معناها التعجب المشوب بالاستنكار ، واحيانا تعني الاستنكار الكامل
هي عندنا تعتبر لفظة نابية فليس معنى انك في مصر او تعامل مصريين ان تقولها لشخص محترم او لسيدة او تذكرها على لسانك في لقاء جاد او رسمي حتى لو كنت تحكي عن اخر قالها ، فهذه نقطة اولى : هي لفظة نابية و عيب .
ثانيا ما سبق يختلف عن لفظة "احيه" التي يقولها اهل الاسكندرية ، فاحية مخففة وليست نابية لهذه الدرجة ويستعملها الاسكندرانية بصورة طبيعية .
* نيجى للكلمه التالته وهى : " الأتم"
(الأتم) أصل الكلمة.
كلمه بنوصف بيها صاحبنا الرخم، التنح واللي عادةً بيكون طول الوقت مُكتئب وحزين وعلشان كدة الكل بيهرب منه.
طب ايه أصل الكلمة؟
على لسان العرب زمان كانوا بيسموا اي اجتماع للستات بأسم (مأتم) سواء إجتماع في فرح أو حزن.
وبعد كدة شمل ال(مأتم) تجمعات الستات والرجاله كمان، ومع مرور الوقت اقتصرت كلمة (مأتم) على تجمعات النساء والرجاله عند موت اي شخص "العزاء " زي مابنقول دلوقتي.
من هنا شبه اللسان المصري الأصيل الشخص الرخم أو التنح ب (الأتم) اللي هي أصل كلمة "مأتم"
* واخيرا الكلمه الرابعه وهى : " شاريك"
ما معنى كلمة ”شاريك/شريتك/اشتريك“ باللهجة المصرية؟
معنى شاريك يعني انت عزيز او غالي عليا او انا باقي على الصداقة والعشرة .ليها معاني كتير حسب الموقف
يعني لما ييجي عريس نقول له احنا شاريينك يعني موافقين عليك ومش هنختلف معاك في تكاليف الزواج يعني انت غالي وعزيز عندنا
لكن كلمة اشتريك يعني انا اغنى منك .انا اشتريك واشتري عيلتك كلها.دا معنى من ضمن معاني كتير حسب الموقف برضه
او انا اشتريك وانت تبيعني يعني انا باقي على العشرة والصداقة وانت خنتني وبعتني وتخليت عني. وهكذااااا
وللمقال بقيه ... تحياتى.
