بقلم جُورج حَبيب
قَاللي القلَم كِفاية كِتَابة
هُو مين بيقرأ والدُنيا غَابة
دَا الناس مَشغُوله بِكتير
الفيسْ والمديا دَا شيء خَطير

والقِيل والقَال كَلام مُوش قَليل
يا عم كِفياك كِتابة
الناس زِهقت ودُول غَلابة
الثَقافة عَفا عَنها الزَمن
والكَل بيستهَجي ولاَ عَجب

وكأنك في سوق بتنَادي
لا أحد سَامعك ولو صُوتك عَالي
واللِي يقُولك بِتقول آيه
فَهمني يا عَم قصدك آيه
مَا تجِيب يَا عمْ من الاخر
حَاجة تكَسبني ولا إنت مُوش فَاهم

هو إنت من دُنيا تَانيه
مُوش عَارف إن الكلام يوَدي في دَاهية
وكَفاية كَلام ولو آخره قَافية
يا عَم كَلمني عَن الاصطنَاعي
ولا الربوُت وشُغل الافَاعي
وكفاية يا عَم كتابة

مَا تزنش زِي الذُبابة
كُنتم زَمان بتقروا كُتب
دلوَقت المُوبايل فيه العَجب
كِفاية كِفاية

وخَللي للكِتابة نِهاية
وإرمي القَلم مع النفاية