ماجدة سيدهم
"  مالكوش دعوة ..هاتوا انتو بس البواقي وأنا هاتصرف "
 
وفجأة نكتشف أن الوقت مر بسرعة والأيام أسرع مما كنا نتخيل ..وبنكتشف أن كل السعي اللي اجهدنا  سنين وماحققناش بيه اللي كنا عاوزينه ماكنش اكتر من خطوات  متعوجة في برية مافيهاش نقطة ميه ..
 
بيحصل لنا صدمة مهولة في نفسنا.. 
 
نحسب الحسبة ونلاقي رغم إن جرابنا بقا فاضي إلاٌ  إن حمله بقا أتقل أوي ..الخسارة دايما اتقل من الحجر ..تقصم الظهر وتقطع النفس ..
 ورغم كدا لسه نفس الصوت حي وبيتكرر كل يوم بطرق مختلفة : ماتخافوش الفرص عندي مابتنتهيش 
 
: طب إزاي .. دا ماعادش حاجة غير باقي من عمر وباقي صحة وشوية قوة ..وباقي من شوية أحلام زمان اتكسروا دلوقتي ..الحاجة الوحيدة اللي كتير وطازة هو الأسف .. ماينفعوش لأي حاجة ..
 
: دي شغلتي أنا و اللي بتقنها من زمان..واظن انتو عارفين عني كدا  ..بشتغل في البواقي وفي النواقص والتالف والنهايات واللي عفن واللي ماينفعش خالص...بعمل منها بدايات رائعة مش هاتصدقوها  ..قدموا انتو بس كل اللي عندكم حتى الندم هاتوه ..وهاتوا ايدكوا في إيدي وأنا هاتصرف بمفاجأة وبمجد  هايفرحكوا ويعوضكوا