ديڤيد ويصا
مشكلة أوريجانوس وأغسطينوس!
--
زي ما شوفنا، الكنيسة بدإت بممارسة معموديّة الكبار ..
اللي آمنوا بالرب يسوع من خلفيّات يهوديّة أو وثنيّة ..
وكمِّلِت بإنها تعمِّد الأطفال اللي أبوهم وأمّهم آمنوا ..
أو الأطفال المولودين في بيوت مسيحيّة!
--
المشكلة فين بقى في معموديّة الأطفال؟
إن أوريجانوس اللي هو أول واحد يشرح سبب معموديّة الأطفال ..
كان –للأسف الشديد– بيؤمن بتناسُخ الأرواح ..
وان النَّفس اللي أخطأِت في حياة شخص ما، بتسيب جسده لما يموت ..
وبعدين تسكن في جسد طفل جديد بيتولِد، وبالتالي هو ملوّث بالخطيّة ..
فربط معموديّة الطفل بتطهيره من الدَّنَس اللي بسبب كده ..
مع إنه بردو كان شايف ان الموضوع مرتبط بخطيّة آدم بصورةٍ ما!
--
المشكلة التانية ان أغسطينوس (٣٥٤-٤٣٠م)
واللي يُعتبَر أب مهم لكل الكنائس الغربيّة ..
زي الكنايس الكاثوليكيّة والپروتستانتيّة (وتحديدًا الكالڤينيّة) ..
بسبب خلفيّته المرتبطة بالديانة المانويّة وتأثُّره بفلسفة أفلاطون ..
كان بيعتقد ان الطفل بيتولد مُدان يستحق العقاب، بسبب خطيّة آدم ..
وان الخطيّة دي بتتنقل ليه بسبب العلاقة الجنسيّة بين الأب والأم ..
وبالتالي علِّم بإن معموديّة الأطفال ..
هدفها غفران الخطيّة الأصليّة للطفل وتطهيره منها ..
واللي هو أصلًا معملهاش، بس مولود بيها ووارثها من آدم!
--
لو رجعنا لإيمان الكنيسة قبل الانقسام، وإجماع الآباء وقتها ..
هنلاقي ان تعليم أوريجانوس غلط ومرفوض من الكنيسة ..
وبيتسمّى حاليًا "العلّامة" أوريجانوس، مش القديس أوريجانوس ..
لأن مش كل تعليمه صح، لكنه أخطأ في حاجات جوهريّة!
نفس الكلام ينطبق على أغسطينوس، لو اتقارن بتعليم الآباء الشرقيّين ..
هنلاقي انهم علّموا بسيادة الموت على الإنسان، وعجز طبيعته ..
لكنّهم مقالوش ان الطفل مُدان ومجرم بسبب خطيّة آدم اللي هو معملهاش!
--
تعليم آباء الكنيسة قبل الانقسام بخصوص المعموديّتين ..
هو ان معموديّة الكبار يسبقها توبة وتلمذة وصوم وصلاة ..
وبعدين تيجي المعموديّة المرتبطة بغفران الخطايا (بسبب التوبة) ..
وتجديد الروح القدس للشَّخص اللي بيتعمّد وبينضم للكنيسة!
بينما معموديّة الطفل المولود في بيت مسيحي ..
هي إعلان لدخوله في العهد وتمتُّعُه بالنِّعمة المرتبطة بإيمان أبويه ..
مش لأنه مجرم ولا مُدان ومحتاج المعموديّة عشان تطهَّرُه من خطيّة آدم!
ولحد النَّهرده الكنيسة في معظم طوايفها بتعمّد الكبار ..
اللي آمنوا بالرب يسوع من خلفيّات مش مسيحيّة ..
وبتعمّد الأطفال المولودين في بيوت مسيحيّة ..
لكن فيه كنايس متأثّرة بتعليم أوريجانوس وأغسطينوس ..
زي بعض الكنائس التقليديّة، سواء في الشَّرق أو الغرب ..
واللي بتؤمن بإن الطفل لو متعمّدش ممكن يهلك!
وبعض الكنايس الپروتستانتيّة اللي بتنتمي لكالڤن ..
على الرغم من انهم بيعمّدوا الطفل حسب تعليم الآباء ..
إلا إن بعضهم بيؤمن ان الطفل لو مات ..
ممكن يهلَك لأن الله مختاروش للخلاص!
#الكنيسة_قبل_الانقسام
ديڤيد ويصا
