ديڤيد ويصا
الكنيسة الأولى قبل الانقسام ..
كانت فعلًا مُبهرة في تعاملها مع الهرطقات ..
وفي تمييزها للأساسيّات، اللي لو اختلف حد عنها ..
ميبقاش مسيحي ويُحرَم من الشَّرِكة مع الكنيسة ..
والفرعيّات اللي ممكن يختلفوا عليها، ويفضلوا مسيحيّين ..
وتفضل ليهم شرِكة مع بعض في كنيسة واحدة!
--
في الأساسيّات ..
أي تعليم يخُص الرب يسوع، أو الله الآب أو الروح القدس ..
كانت الكنيسة بتتعامل معاه بمنتهى الحرص والحزم ..
اللي يلغي ألوهيّة الرب يسوع أو إنسانيّته، هرطقة ..
اللي يقلّل من ألوهة الابن أو يقول انه أقل من الآب، هرطقة ..
اللي يعتبر جسده كأنّه خيال مش حقيقي وملموس، هرطقة ..
اللي يفصل بين ألوهة الابن وإنسانيّته ويعتبرهم شخصين، هرطقة ..
اللي يفترض ان الرب يسوع مخلوق ومش أزلي، هرطقة ..
اللي يقول انه ممتش، لكن ألقى شبهُه على حد تاني ومات بداله، هرطقة ..
اللي يقلّل من –أو يلغي– ألوهة الروح القدس، هرطقة!
--
لكن كمان كان فيه ٣ هرطقات تانيين ..
أدانتهم الكنيسة وحكمِت عليهم ..
مع إنهم مش بيمسُّوا الرب يسوع بشكل مباشر ..
وموجودين كتير في كنايسنا، وان كانوا واخدين أشكال مختلفة!
--
الأولى، تخص "وحي العهد القديم"، من واحد اسمه "بطليموس" ..
علّم ان العهد القديم مش كله من الله (أو الوحي الجزئي)!
التانية، تخص "إله العهد القديم"، من واحد اسمه "ماركيون" ..
علّم بإن إله العهد القديم إله شرير، ومش هو أبو ربّنا يسوع المسيح!
التالتة، تخص "الكاريزماتيّة القديمة"، من واحد اسمه "مونتانوس" ..
علّم ان الإعلانات الإلهيّة مش حِكر على عصر الرُّسُل ..
وانه بياخُد إعلانات من الروح القدس، واعتبر نفسه نبي ..
وعمل لنفسه مجموعة انتشر وسطها الانفعالات الجسديّة وقت العبادة ..
والنطق والتَّمتمة بكلمات مش مفهومة، ادّعى انها من الروح القدس ..
وكان ليه تلميذتين، اسمهم "بريسكا" و "ماكسيملا"، وسماّهم نبيّتين ..
الكنيسة حكمِت بهرطقتهم واعتبرتهم أنبياء كذبة!
--
طب إيه هي الفرعيّات اللي كان فيها اختلاف في الكنيسة الأولى ..
لكن الكنيسة قبلِتها بدون هرطقة أو فصل، وفضلوا جُوّة الكنيسة؟
وإيه الآراء الفرديّة لبعض الآباء، لكن إجماع الكنيسة مكنش متبنّيها كتعليم؟
ده اللي هحكي عنه في الپوست الجاي!
#الكنيسة_قبل_الانقسام
#ضد_أشباه_ماركيون
ديڤيد ويصا
