ديڤيد ويصا
أول شهادة بتجيلنا من الآباء في الكنيسة الأولى ..
كانت من القديس يوستينوس (١٠٠-١٦٥م)
بيقول عن اليهود اللي أمنوا بالرب يسوع، انهم:
"يأخذون نعمًا من الله حسب استحقاق كل واحد ..
فواحد يأخذ روح الحكمة، وآخَر روح المشورة، وآخَر روح الثّبات ..
وآخَر روح الشّفاء، وآخَر روح التنبؤ ..
وآخَر روح التّعليم، وآخَر روح مخافة الله." (الدفاع ٣٩:١)
--
القديس "إيرينيوس" أسقف ليون (١٣٠-٢٠٢م)، بيقول:
"إننا نسمع أيضًا أخوة كثيرين في الكنيسة، لديهم مواهب نبويّة ..
وبالروح يتكلّمون بكل أنواع اللُّغات (الألسنة) ..
ويعلنون سرائر (أسرار) الله." (ضد الهرطقات ٥، ١:٦)
--
العلّامة ترتليان (١٥٥-٢٢٠م)
بعد ما قدِّم شويّة مشابهات بين مواهب الروح القدس في العهد الجديد ..
وبين صفات روح الرب في نبوّة إشعياء، زي:
"الحكمة والفهم والمشورة والقوة والمعرفة ومخافة الرب" (أش٢:١١)
إتحدّى "ماركيون" المُهرطِق اللي رفض العهد القديم ..
إنه يمارس مواهب الروح، طالما مش بيؤمن بإله العهد القديم ..
وتحديدًا المواهب الموجودة في (١كور١٤)، زي:
"موهبة النبوّة، أو كشف خفيّات القلب ..
أو ترجمة الألسنة (١كور٢٥:١٤-٢٦)"
وبيقولّه ان المواهب دي بتكون عنده (غالبًا يقصد في الكنيسة) ..
وبيميّزها بكل سهولة، وده بيتّفق مع ..
قواعد وتدابير ووصايا الله!" (ضد ماركيون ٨:٥)
--
طبعًا هييجي السؤال هو انا ليه معتبر ده فرعيّات ..
طالما محدّش من الآباء هاجِم المواهب الروحيّة ..
أو اعتَبَرها خاصّة بعصر الرُّسُل بس؟
لأن المشكلة مكانتش في أيّام الكنيسة قبل الانقسام ..
لكن المشكلة قائمة وموجودة في أيّامنا احنا ..
ما بين فريق من المسيحيّين بيقول ان مواهب الروح القدس ..
الموجود عيّنة منها في (١كور٤:١٢-١٠)
كانت موجودة في العصر الرّسولي بس ..
لأنها مواهب تأسيسيّة هدفها تثبيت وتأكيد الكرازة!
وفريق تاني بيقول انها مُستمرّة لغايت النَّهرَده ..
مع التركيز على موهبة التكلُّم بألسنة (أو لُغات) ..
وبالتالي عملوا طايفة (أو طوايف لوحدهم)!
--
وفريق تالت كاريزماتي ..
ملوش طايفة ومجتمع دايمًا برَّه الكنايس ..
وبيمارس الألسنة معظم الوقت بصورة ..
لا تتّفق خالص مع القواعد اللي حطَّها الرسول بولس!
لأن اللي بيتكلّم بلسان ..
بيتكلّم من غير ما يكون فيه ترجمة من حد تاني ..
عكس تمامًا اللي أمر بيه الرسول بولس (١كور٢٨:١٤)
واللي بيتكلّموا بألسنة، بيتكلّموا بصوت عالي في نفس الوقت ..
والنتيجة ضوضاء وتشويش بلا معنى (١كور٣٣:١٤)
وللأسف مبقيناش عارفين ده من الروح القدس ولا لأ!
--
هل ينفع نرجع للكنيسة الأولى قبل الانقسام ..
ونقبل بعض في كنيسة واحدة سواء عندنا مواهب أو معندناش؟
ولا لازم نفضل طايفة تطلع من طايفة تانية، وناس منها تطلع بطايفة تالتة؟
--
المصادر:
القديس يوستينوس الفيلسوف والشهيد، الدفاعان والحوار مع تريفون ونصوص أخرى. النصوص المسيحية في العصور الأولى، مجموعة من المُترجِمين (القاهرة: مركز باناريون للتُّراث الآبائي، ٢٠١٢)، ١٨٤.
--
Irenaeus on the Gift of Tongues:
https://charlesasullivan.com/.../irenaeous-on-the.../...
--
Against Marcion, Book V
https://www.newadvent.org/fathers/03125.htm
--
#الكنيسة_قبل_الانقسام
ديڤيد ويصا
