ديڤيد ويصا
عاوز اتكلّم عن المُطلَّقات المسيحيّات ..
أيوه زي ما قريتوها كده!
--
الموضوع يبدو لأغلبنا، انه حالات قليلة ..
لكن اللي بيخدموا سواء خدمة كنسيّة أو في المشورة ..
يعرفوا ان الحقيقة أكبر من كده بكتير!
البنت، على عكس الولد، معافرة في العلاقات ..
مش بسهولة تسيب علاقة، مهما كانت مضرورة منها ..
الولد بيفضّل الانسحاب، أو تَجَنُّب المشاكل (وده بيزوّدها) ..
وعشان كده، في أغلب المشاكل الزوجيّة ..
هتلاقي البنت هي اللي بتروح لمشيرين أو دكاترة نفسيّين أو خُدّام ..
عشان تحكي، سواء بلسانها أو بلسان جوزها ..
وبتبقى عاوزه تبذل مجهود في العلاقة وتشتغل عليها ..
حتى لو مش هي اللي غلطانة، وغالبًا هو اللي بيكون غلطان!
--
وعلى الرغم من ان قرار الطّلاق اللي بتاخدُه البنت ..
يبدو للناس اللي برّه الموضوع انه مريح نفسيًّا للبنت ..
لأنها أخيرًا خِلصِت من علاقة مؤذية ..
سواء مغصوبة عليها من أهلها، واتجوّزِته بالعافية ..
أو بتتإذي فيها جسديًّا أو ماديًّا أو نفسيًّا ..
إلا إن القرار ده بالنّسبالها صعب جدًّا وفيه مخاطرة ..
ممكن تخسر فيها بيتها أو ولادها أو متلاقيش مصدَر دَخل ..
ده غير الرّفض اللي بتتعرَّض ليه من المُجتمع الكَنَسيّ!
--
ولأن أغلب الناس "الخُدّام" و "المسؤولين" في الكنايس والهيئات ..
بيخافوا على نفسهم وسُمعِتهُم، وبيتهم ومصدر دخلهم ..
مش بيساعدوها، حتى لو اقتنعوا انها لازم تتطلَّق ..
وأوقات كتير ممكن ينصحوا من بعيد ..
لكن يتخلّوا عنها أول ما تبتدي تاخُد خطوات في الموضوع ..
وده بيخلّيها تلجأ لكل الطرق الصَّح والغلَط اللي ممكن تتطلَّق بيها ..
وبيعرَّضها لابتزاز واستغلال مادي من مسؤولين كُتار، بياكلوا عيش ..
قُصاد انها تنجو بنفسها وحياتها من علاقة مش نافع تكمِّل فيها!
--
اللي عاوز اقوله للمؤمنين:
أرجوكوا ارحموهم واحترموهم وقدَّروهم وتعاطفوا معاهم ..
بلاش نظرات الازدراء والاستعلاء اللي بتبُصُّوا عليها بيها ..
بلاش الخوف منهم كما لو كانوا خطر على ولادوا واجوازكوا ..
بلاش تكرَّهوهم في الكنيسة والمؤمنين والخُدَّام، بسبب رفضكوا ليهم ..
هُما مش محتاجين مساعدة منكوا ولا شفقة عليهم ..
هُمّا بس محتاجين تقدير واحترام وتَفَهُّم، وشيل على الرّاس ..
لأنهم فعلًا شُجعان وأبطال ويستحقوا تقديركوا واحترامكوا ..
احتووهم، واحتووا ولادهُم، ووفَّروا ليهم كل سنَد محتاجينه ..
خليّهم يشوفوا فيكوا العيلة اللي هُمّا افتقدوها غصبِن عنهم ..
بلاش يبقوا هربانين بحياتهم من علاقة مميتة ..
فيلاقوا نفسهم ملهومش نصيب من الحياة معاكوا ..
وافتكروا ان الرب يسوع، اللي بتنتموا ليه وبتخدموه ..
قال ان اللي هيرحَم، هيِترِحِم ..
واللي مش هيرحَم، مش هيشوف رحمة!
ديڤيد ويصا
