د.امير فهمي زخاري المنيا
المكان
الايقونه موجوده فى كنيسه العذراء العزباويه مقر دير السريان
موجوده في محطه الشهداء بعد شارع كلوت بيك جنب الازبكيه القديمه.
وصول الايقونه
بعد ما بنوا كنيسه العزباويه واختاروها كمقر للدير...
في واحد من رؤساء الدير فى الوقت ده جاب معاه ايقونه العجائب من الدير وحطها فى مقصورة وحط قدامها قنديل وابتدي الناس يعرفوها ويجوا ليها عشان ياخدوا بركتها من كل مكان وكانت بتعمل معجزات كتيره جدا وعجائبيه فعلا.
معلومات عن الصورة
ايقونة العزباويه واحده من ٣ ايقونات رسمها لوقا الرسول تظهر فيها العذراء شايله يسوع على رجلها وتحت رجله يوحنا المعمدان وده تفسير للايه:
ها أنذا أرسل قدام وجهك ملاكي الذي يهيئ طريقك قدامك " (مر 1: 2)
ووراه حمل صغير رمز لان ربنا يسوع المسيح هو الحمل الحقيقي.
حكايه فى العزباويه :
كانت العدراء مباركه المكان اللي فيه الكنيسه أثناء زيارتها لمصر وهما معدين استرحوا عند راجل فلاح فسقاهم وحكتله العذراء عن قصتهم وقالتله ابني يسوع يصنع معاك معجزة انك اول ماتزرع البطيخ هيطلع تاني يوم رغم انه فى العادي بياخد حوالي ٣ شهور..
الراجل امن وصدق وقالتله العدراء الرومان بيجروا ورانا احنا هنمشي وهما هيجوا يسألوا علينا اول مايسألوك انت شوفتنا امتي رد عليهم قولهم من ساعه ما كنت برمي بذور البطيخ وفعلا حصل كل ده تاني يوم صحي لقي البطيخ كبر وملئ الحقل بتاعه وجه الرومان وعمل زي ما العذراء قالتله بالظبط
معجزاتها المشهورة والرائعه:
كان فى ايام الانبا فيلوثاؤس رئيس الدير اللي قبل الأنبا ثاوفيلوس وكان وقت الزياره ..جاءت عيله ام وزوجها وأولادها ولما فضلوا قاعدين فى المزار فتره طويله والام عماله تبكي ولما جه وقت انتهاء الزياره وقفل الكنيسه طلب الرهبان المسئولين من العيله ديه انهم يروحوا فرفضوا وقالت الام انا مش همشي غير لما العدراء تشفيني كانت مصابه بسرطان فى الثدي وكانت رايحه اليوم اللي بعده تعمل عمليه استئصال للثدي وفضلت تبكي طول الليل فسابوها الرهبان وبعد شويه سمعوا صوت تهليل وفرح فنزلوا يشوفوا في ايه فلقوا الام بتحكي انهم كلهم ناموا بعد نص الليل وبعدين حست الام بحد بيصحيها فقامت... لقيتها العدراء وقالتلها انا العدراء ام النور اللي بتطلبيني على طول وابني يسوع أرسلني عشان اعملك العملية ومدت ايديها ولمست ثديها ورشمت عليه الصليب فراحت الاورام والقرح وقالت لها اشكري ربك يسوع وقولي مع داود النبي باركي يانفسي الرب وكل مافي باطني فليبارك اسمه القدوس باركي يانفسي الرب ولا تنسي كل حسناته...
وفضل مكان الصليب موجود مهما غسلته وراحت تاني يوم للدكتور اكد لها انها معجزة اكيده وليتمجد اسم الرب
معجزة تالته:
كان فى ام من الروم كانت دايما بتيجي تدي ابونا هناك ريال وتقوله اعملي تمجيد للعدراء وتفضل تبكي قدام الصورة ولما سألها ابونا عن سر بكائها قالتله ابني اخدوه فى الجيش في لبنان وكان كل فتره يبعتلي جواب واخر جواب كان فيه انه تعبان جدا ومن ساعتها ماطمنهاش عليه وكانت خايفة يكون راح السما وبعد ١٣ يوم جاءت الام مبسوطه جدا وادت ابونا جنيه وقالتله اعملي تمجيد كبير ابني بعت جواب وطمني عليه وقالي انه لما كان تعبان جاتله العذراء وادلته كوب لبن فشربه وخف فى الحال
ولما سألها انتي مين قالتله انا العدراء ... مامتك دايما تصليلي فى العزباويه وبعتاني ليك من مصر.
كان في العزباويه بئر ميه كانت شاربه منه العذراء ولسه موجود على باب الكنيسه من الشمال.
والزياره كل يوم من ٧ ص حتى ٦ مساء
بركه العذراء وصلواتها وايقونتها فلتكن معنا ولربنا المجد الدائم الي الأبد امين.
د.امير فهمي زخاري المنيا
