ديڤيد ويصا
عشان المشاكل والتحقيقات اللي حاصلة حاليًا ..
ولأن أكتر من حَدّ شاركني بحاجات وأسئلة ..
تخُص سلوكيّات بعض الولاد والرجّالة المقلقة ناحية البنات ..
عاوز اشارك بشويّة أفكار عمليّة لو حسّيتي انك قلقانة من حَدّ ..
حاجات تعمليها بنفسِك لنفسِك، وحاجات تشاركيها مع حد يساعدِك!
--
بالنسبالِك ..
لو الموضوع ليه علاقة برسايل منه، فيها أي حاجة مُقلِقة ..
زي تعليقات على شكلك وجسمك أو طلبُه لصور ليكي ..
أو كلامه في حاجات جنسيّة ..
أو مشاركته ليكي بكُتُب أو بوستات فيها حاجات جنسيّة ..
احتفظي بالحاجات دي متمسحيهاش ..
وفي نفس الوقت متتجاوبيش معاها بطرق مايعة ..
حتى لو من نوعيّة ال react اللي بالقلوب ..
لأن دي حاجة هتشجَّعُه يكمّل ومش هتدينه!
--
بالنسبالك ..
لو الموضوع ليه علاقة بتلامُس أو حُضن ..
أرجوكي بلاش السّلام بالحُضن مع ولد أو راجِل ..
واللي بقى منتشر بطريقة غريبة وغير مُبرَّرة ..
لأن ده بيفتح الباب على الواسع لناس مش كويّسة ولا مضمونة ..
وحقّك تمامًا ترفضي لو حَد منهم بادِر بده، وتكتفي بالسّلام بالإيد ..
ولو أصَر، ارفضي بصورة واضحة واكسفيه عادي جدًّا ..
حتى لو كان قسّيس أو شيخ أو راجل كبير، مش مهم هو مين!
أنا عارف ان ده هيفتح عليّ نار كتير، بس مش مهم!
--
بالنسبة للموضوع ..
شوفي مين تاني من البنات حواليكي عندها مشكلة مع نفس الشَّخص ..
وروحوا شاركوا ده مع ناس موثوق فيهم ومسموعين في الكنيسة ..
موثوق فيهم، عشان تحسّوا بأمان وانتي بتشاركيهم ..
ومسموعين، عشان يكونوا مؤثّرين على المسؤولين في الكنيسة ..
مش كل اللي موثوق فيهم، مسموعين ..
ومش كل المسموعين، موثوق فيهم!
--
بالنسبة للموضوع ..
روحي انتي وبقية البنات شاركوا قادة الاجتماعات بتاعتكوا ..
ومش القادة الولاد، لكن القادة البنات، وبردو يكونوا مسموعين ..
عشان هيساعدوكوا تتحرّكوا ازّاي ويكونوا في ضهركوا!
--
بالنسبة للموضوع ..
روحوا شاركوا القسوس في كنيستكوا، لو فيه أكتر من قسّيس ..
وشاركوا زوجاتهم كمان معاهم، لوحدهم مش وهُمّا مع القسوس ..
وميكونش فيهم حَد، طرف في المشكلة أو هو اللي هتشتكوه!
--
الاقتراحات دي مش أكيد هتخلّي المسؤولين يتحرّكوا ..
بالذات لو كان المُتحرّش ليه سُلطة بيستفادوا من وراها ..
بس على الأقل هتخلّي المُتحرّش يخاف ويلِمّ نفسه ..
لأن المُتحرّش لما بيلاقي كذا جبهة مفتوحة عليه، بيخاف ..
مش من النتيجة ولا من العقاب، لكن من الفضيحة ..
بالذات لو عنده زوجة وأولاد أو بنات ..
الهدف مش تربية المُتحرّش ولا عقابه، لأن ده مش شرط يحصَل ..
لكن الهدف هو تقليل أذاه ليكي ولبقية البنات، قَدر الإمكان!
ديڤيد ويصا
