كتب - محرر الاقباط متحدون
قال الكاتب محمد ابو قمر :" الأيام إللي جايه دي كلها أعياد مصرية مسيحية ، يعني : يوم 11 إبريل ختام الصوم الأربعيني ، لغاية يوم شم النسيم الاتنين 21 إبريل ، حوالي 5 أو 6 أيام فرح من ضمنهم عيد القيامه المجيد يوم 20 إبريل، وطبعا عيد القيامه المجيد هو عيد جميع المسيحيين علي مستوي العالم .
مضيفا عبر حسابه على فيسبوك :"وبالمناسبه المجيده دي في كل سنه بتطلع بعض الكائنات الزونبية وحيدة الخلية تبقبق وتقول : لا يجوز تهنئة المسيحيين بأعيادهم ، يعني الكائنات الزونبيه دي بتحرم علي مسلمي العالم تهنئة جميع المسيحيين في الكره الأرضية، طيب إنت مش عايز تهني المسيحيين بأعيادهم حضرتك لابس الساعه إللي هما اخترعوها ليه ؟ ، المفروض ما تركبش طيارتهم ، ولا سفنهم ، ولا سيارتهم ، المفروض لما تعوز تسافر تركب الحمار أو الجمل ، وإوعي تستخدم أي حاجه من اختراعاتهم علشان حرام... التليفزيون....الكمبيوتر....المضاد الحيوي....علاج البواسير.....الفياجرا....، ولم تعوز تستحمي عندك الطشت اقعد فيه وخلي أمك تصب عليك الميه بالكوز.....إنت بتقول تهنئة الأغيار بعيدهم حرام شرعا ، في نفس الوقت اللبس الداخلي إللي إنت لابسه هما إللي اخترعوا الأستك بتاعه ، يبقي المفروض تربطه بحبل زي ما كان جدك بيعمل زمان لأن استخدام الأستك حرام برضه شرعا.
موضحا :"شوفت فيديو لواحد من الكائنات الكريهه دي بيقول فيه للمسلم : لما تتجوز واحده مسيحيه متحبهاش ، متسلمش عليها ، متقولهاش كلام حلو ، إنكحها بس ، وواحد منهم لما أصابه المرض ركب طيارة الكفار وراح علي بلاد الكفار ودخل مستشفي الكفار علشان إللي هو بيكفرهم ويحرم تهنئتهم بأعيادهم يعالجوه.
واختتم :" كل سنه ومصر بخير ، عيد القيامه المجيد هو عيد مصري لكل المصريين زي ما عيد الفطر عيد مصري لكل المصريين ، وياريت الكائنات الكريهه إللي بستخدم الدين لنشر الكراهيه ياريتهم يشوفوا المصريين جميعهم مسلمين ومسيحيين بيحتفلوا إزاي بعيد شم النسيم ، كل سنه والمصريين بخير.
