كتب - محرر الاقباط متحدون
دعم المفكر والطبيب خالد منتصر، أستاذ الفقه المقارن بجامعة الأزهر، الدكتور سعد الدين الهلالي، بعد الهجوم عليه كونه تنويري .
ودشن منتصر عبر حسابه على فيسبوك، هاشتاج باسم "أكان لابد يا سعد أن تضيء النور"، وكتب :" انت عارف يا دكتور سعد لو كنت سجدت لله شكراً على هزيمتنا كانوا حيحطوا صورك على الميكروباصات،ولو كنت قلت ان تارك الصلاة يقتل كانوا حطوا كلامك بعد كل أدان خمس مرات في اليوم، ولو كنت قلت ان نكاح البهايم والجثث حلال ،كانوا كرموك واستضافوك يومياً على قنواتنا.
وتابع :" ياريتك قلت ان الحمل أربع سنوات كان زمانك دلوقتي رئيس اللجنة الدينية في البرلمان،
ويا ريتك كفرت المسيحيين وقلت ان زواج الطفلة المربربة حلال ما دامت تتحمل الوطء ، كان زمانك دلوقتي انطلقت من شقة العبور على أمريكا وخدت الجرين كارد وعملت على صفحتك ٥ مليون فولور،
مش كنت تحرم الإحتفال بشم النسيم وما تقفش للسلام الجمهوري ولا تحيي العلم يا دكتور سعد ، كنت دلوقتي حتعرف تكون حزب سلفي وتحصل على كراسي في المجالس النيابية، يا دكتور سعد صدقني،
لو طلعت بتصريحين تلاته من دول حتلاقيك بكره مرفوع على الأعناق، ومنضم لهيئة محتكري الفتوى، وتحصل على تاج الجزيرة ، وتاخد ختم ذوي اللحوم المسمومة، ومش بعيد يشيلوا صور إمام الدعاة من على الميكروباصات ويضعوا صورتك !!!.
يذكر ان محكمة القضاء الإداري، قررت تحديد جلسة 1 يوليو المقبل للنظر في دعوى تطالب بعزل د. سعد الدين الهلالي من منصبه في الازهر ، ومنعه من إصدار الفتاوى والظهور الإعلامي، جانب إحالته للمحاكمة الجنائية.
