ديڤيد ويصا
باخد خلوتي حاليًا في رسالة كورنثوس الأولى ..
ومبهور ومستمتع بحاجتين، حابب اشارك بيهم!
--
الحاجة الأولى، إن كنيسة كورنثوس ..
على الرغم من كل المشاكل والانقاسامات اللي فيها ..
لكنّهم اهتمّوا يبعتوا جواب للرسول بولس ..
يسألوه فيه عن رأي الله في أدق تفاصيل حياتهم ..
جواز، طلاق، بتوليّة، لبس، أكل، فلوس، طريقة العبادة!
الحاجة التانية، إن الرسول بولس ..
اهتم انه يرد على كل تساؤلاتهم بالتفصيل، وأدق التفاصيل!
--
أعتقد ان منبر الكنيسة حاليًا ..
لأنه قرَّر، بوعي أو بدون وعي ..
إنه ميتكلّمش في بعض الأمور والتحديات اللي بنواجهها يوميًّا ..
ظلم، فساد، محسوبيّة، رشوة، ابتزاز ..
سرقة، تحرّش، استغلال سُلطة، خيانات زوجيّة، طلاق ..
لبس غير محتشم، سُكر ورقص في أفراح المسيحيّين ..
تدخين وشيشة، شتايم وحلفان ونُكَت وتلميحات جنسيّة!
خلّى المسيحيّين يتحوّلوا لطريق من اتنين ..
إما انهم يعملوا كل الحاجات دي ..
بدون أي تمييز لهويّتهم وانتمائهم للرب يسوع ..
وبالتالي بقى زيُّهم زي العالم وأسوأ!
أو انهم ميفكّروش يسألوا عن رأي الكتاب في الحاجات دي ..
باعتبار ان الكتاب مكانه بس وقت الوعظة ..
لكنه مينفعش، ومش من حقّه يتكلّم في، أمورنا اليوميّة!
--
بالدرجة اللي بيها بقى لو حد اتكلّم في المواضيع دي ..
يعتبروه جاهل ومتخلّف وقديم ومش مستنير ولا متطوّر!
لكن أعتقد ان الكتاب المقدس كتاب عملي ..
والله يفرق معاه عقيدتنا وفكرنا، وكمان حياتنا وسلوكنا ..
ومفيش شِبر واحد في حياتنا مش من حق الله انه يملُك عليه ..
وبالتالي من حقّه انه يوجّهنا ويحكمنا في أدق وأصغر تفاصيل حياتنا!
--
يا كل كاهن وقسيس وخادم ومتكلّم وواعظ ..
افتكر انك بتخدم الله في الناس ..
مش حد تاني ولا حاجة تانية ..
متخافش، محدّش كاسر عينك ولا بيذلَّك ..
اطلب من الله حكمة ونعمة وجرأة وقوة وسُلطان ..
وفوق الكل، محبّة لأجل اللي بتخدمهم ..
لأنهم مسؤوليتك أمام الله، وانت وكيل عليهم ..
وهتتحاسب على اللي قلته ليهم ..
وكمان على اللي كان مفروض تقوله وفضَّلت الصّمت!
والكل لازم يكون بحسب فكر الله، وبحسب كلمته ..
ومهما كانت التكلفة، وأكيد هتدفع التكلفة ..
فالرب لا يمكن يسيبك تدفعها لوحدك ..
لكنه هيشيلها معاك ويشيلك معاها!
#من_خلوتي_ديڤيد_ويصا
ديڤيد ويصا
