محمود علام
إيران قررت تقفل مضيق هرمز… وتقريبًا كل اللي كنا خايفين منه خلاص على وشك الحدوث..
من حوالي ساعة كده، التلفزيون الإيراني أعلن إن البرلمان الإيراني وافق رسميًا على قرار غلق مضيق هرمز – أهم ممر ملاحي لنفط العالم – ودلوقتي مستنيين توقيع المجلس الأعلى للأمن القومي على القرار، واللي ممكن يحصل خلال ساعات..
⚫️ طيب القرار ده معناه ايه، وليه هو مخيف؟!
مضيق هرمز ده يا صديقي هو واحد من أهم الممرات البحرية في العالم.. بيمر منه حوالي 20% من التجارة الدولية، وهو المنفذ الرئيسي للنفط الخليجي اللي بيشغل المصانع والآلات الحربية والعسكرية للجيوش الغربية ولأمريكا..
🟢 الممر ده إغلاقه حرفيًا يعتبر خيار انتحاري بالنسبة لإيران، لإنه فعليًا هيأدي لخسارة العالم لما يقرب من 40% من انتاج النفط العالمي، وهيرفع أسعار النفط لدرجة تتعدى ال 150 دولار للبرميل الواحد، ولو استمر هيتسبب في تضخم وغلاء اسعار رهيب وممكن يأدي لإفلاس شركات وبداية أزمة اقتصادية غير مسبوقة هتأثر على بلاد العالم كله بلا استثناء، وأكبر حتى من أزمة 2008..
🔹️ أقرب وصف ومثال للقرار ده هيقربه لذهنك، هو انه مشابه لقرار مصر بغلق خليج العقبة أمام الملاحة الاسرائيلية اللي أدى لحرب 67 والنكسة..
🟣 طب هل ده الحاجة الوحيدة اللي عملتها إيران بعد القصف الأمريكي لمنشآتها النووية النهارده الفجر؟!
لأ خالص.. إيران ردت خلال الساعات اللي فاتت بصواريخ شديدة التدمير من نوع (خيبر) و(خرمشهر)، اللي هما أقوى صواريخ في ترسانتها تقريبًا.. والصواريخ دي ضربت تل أبيب، حيفا، ومطار بن غوريون ومدينة نيس زيونا في الأراضي المحتلة..
🟡 حجم الدمار حسب وسائل الإعلام الإسرائيلية في الضربة الأخيرة دي كان مرعب.. الدفاعات الجوية الاسرائيلية مقدرتش تتصدى لعدد كبير من الصواريخ، واللي اتسببت في تدمير مباني ومنشآت بالكامل اتنسفت واتمسحت من مكانها
🔵 ده غير ان واحد من الصواريخ اللي نزل في مدينة نيس زيونا، أدى لأضرار بالغة في معهد اسرائيل للأبحاث البيولوجية.. وده لو متعرفش؛ هو أكبر وأهم مركز أبحاث بيولوجي في اسرائيل كلها، وأكثرهم سرية... اتأسس سنة 1952 ومتهم دوليًا بإنه المسؤول عن تطوير الأسلحة البيولوجية والكيميائية الإسرائيلية في تقرير لهيومن رايتس ووتش هسيبهولك في المصادر 👇 وفي كلام منتشر في الإعلام حاليًا ان الضربة دي ممكن تكون أدت لتسريبات بيولوجية خطيرة في البيئة هناك (بس لسه غير مؤكد)..
🔵🟢🔴 (والخبر ده بالمناسبة لسه طازة ومش هتلاقيه في ولا وسيلة اخبار عربية لسه، وهتلاقيهم بيتكلموا عنه كمان شوية...)
🟠 بس كل ده ولا ييجي حاجة جنب موضوع إغلاق مضيق هرمز...
إيران بالقرار ده معناها انها بتبدأ حرب مع العالم الغربي كله، وغالبًا في خلال الساعات اللي جاية لو القرار اتنفذ هتشوف هجوم رهيب من الغرب عليها في الإعلام، والموضوع ممكن يوصل لحد التدخل البري من حلف دولي من القوات الغربية على أراضيها، لو متمش التوصل لاتفاق..
🟢 والواضح هو إن إيران خلاص مش عايزة توصل لاتفاقات، وبتعتبر الضربة الأمريكية دي إهانة ضخمة لا يمكن تتسامح معاها، خصوصًا انها أدت لتعطيل برنامجها النووي لمدة شهور أو سنين على أقل تقدير... (متدمرش بالكامل، اتعطل بس، لإنهم نقلوا المواد النووية اللي كانت موجودة في المواقع قبل القصف، وكانوا عندهم معلومات استخباراتية باللي هيحصل)..
🟣 اللي بيدعم الكلام ده بقى، وبيخلي الموقف أكثر تعقيدًا واشتعالاً هو ان روسيا دخلت على خط في المعركة، ونائب رئيس مجلس الأمن القومي الروسي قال من شوية إن أمريكا بتدفع العالم لصراع شامل، وهدد بإن "هناك دول مستعدة لتسليح إيران نوويًا لو لزم الأمر"!
🔵 ومش بس كده.. ده بوتن نفسه صرح انه العالم يقترب من الحرب العالمية الثالثة.. وهنا مقصدش حرب نووية.. أقصد حرب عسكرية عالمية جديدة..
وفي النهاية، السؤال هنا مبقاش "هل الحرب بدأت؟" عشان هو خلاص واضح أوي الموقف رايح فين، ومبقيناش محتاجين للسؤال ده...
🟢 السؤال الحقيقي هو هل في حد عاقل هيقدر يحتوي الموقف ويهدي من التصعيدات دي، قبل ما العالم كله ينزلق لأهوال نزاع عالمي يعيدنا جميعًا عشرات السنين للوراء؟!
🔴 المصادر كلها تحت في الكومنتات، وكالعادة متنساش تعمل شير عشان التطورات توصل لغيرك ويفهم أيه اللي بيدور دلوقتي، واحنا داخلين على أيه...
