بنات العنب

تمن العوز ١٣٠جنيه ..

دا مبلغ مغري جدا علشان يتسابق الورد اللي لسه مافتحش وينزل يواجهه عالم شرس ورخيص أوي ..محاولة على قدر طاقتهم علشان يقدروا  يحققوا  أي حاجة من الحلم  اللي هو يادوب مجرد حق طبيعي لأي إنسان  ..

 

ومش دول بس ..بصوا ع الوشوش في الشوارع وانزلوا لتحت وأدخلوا العمق من جوه أوي..هاتعرفوا خشونة ملمس القهر والحلم  في توب واحد ..

وخلصت  الحكاية ..

حكاية عادية جدا وبتكرر لنفس الأسباب ..وعادي برضه  هاتتلم  بشوية فلوس ..(يالسخرية الواقع الفاسد )

 

مش مهم اللوم على التفاصيل ولا عن طريق مش ممهد ..ماهو دا حاله من زمان ..

ولا مهم حالة السواق ولا المشي عكس الإتجاه ..ماهو دا برضه عارفينه وعادي وبيتكرر من زمان ..

ولا المهم أن الأطفال دي تشتغل ومنهم في سن ال١٣..

( وماله  الشغل كويس) من غير أي حماية من الاستغلال ولا تقدير ولا دعم ولا أي خدمات أو تسهيلات للمعيشة الضنك ..برضه دا عادي وبنشوف أطفال كتير في سن ٧ سنين وطالع عينهم في أعمال شاقة ..عادي ..

 

ودول زيهم  ملايين ..لاحد عارفهم ولاشايفهم لأنهم م الآخر معدومين ..بعني  برا الحسبة خالص ..

 

ولا المهم كم الفساد المسؤول ماهو دا العادي من زمان ..ولا كم القسوة اللي بقت في الظلم ..

 

لكن المهم .. أن دا اللي فضل من الحلم اللي مالحقش يفتح ..

 باقي لأشلاء صنادل بلاستيك تمنها يادوب مشوار راح ومارجعش  .. مشوار أرخص جدا من تمن الحياة ..

 

دلوقتي راحوا للسماء اللي قَدّرت أمالهم وضحكاتهم واشترت كل الورد بالغالي ..

 

*, تعزياتك يارب لكل قلب أم صعب أنه يستوعب فاجعة الاختطاف..

 تعزياتك يارب لكل البيوت الحزينة لضحكات أختفت قبل الآوان ..

 

*ياريت  كل اللي يقدر يدعم أو يساعد أو يطبطب على الأسر المكلومة مايتأخرش ..أفراد ..مؤسسات.. جمعيات.. الزيارة مشاطرة مهمة ..التعزية بكلمة هي دعم نفسي مهم ..ومهما قدمنا من تعويض عمره مابيعوض عن اللي راح 

العزاء للجميع  لأن كل البيوت موجوعة ..