نصيحة لوجه الله !!
د. أمير فهمى زخارى
متجريش ورا حد ، ومتفكرش مين سأل ومين مسألش، ومين جدع ومين خذلك، ومين قدامك حبيبك و ورا ضهرك بياكل في لحمك بالغيبة، حاول متدققش في التفاصيل وبص للحياه... والناس اللي حواليك زي الموج اللي بيروح وييجي
كبر دماغك و عيش اللي باقيلك وسيبها على الله .
ملحوظه...
هتلاقي في حياتك ناس بتحاول تثبتلك إنك وحش أكتر ما بيحاولوا يكونوا هما كويسين...
اللي شايفك احسن منه هيحاول دايماً يقلل منك قدام الدنيا كلها.. وده طبعاً نقص وهيفضلوا حاسين ب النقص دايما !!
اتأكد إن اللي خذلك وبعد عنك خسرك مش انت اللي خسرت ..
خليك زي ما انت انسى كل اللي فات وحب الخير للى حواليك وادعم القريبين منك.. حرص بردو ما تأمنش لكل الناس.. والأهم إنك تبقى مع ربنا لأنك من غيره هتتعب ومش هتعرف تلملم اللي جواك بسهوله .. هتمر الأيام والحاجة اللي اتخذلت فيها هتلاقي ربنا
بيراضيك فيها !!
ف ما تقلقش .. مفيش حُزن بيدوم
ولا وجع بيستمر
المشكلة اللي انت حاسس بيها دلوقتي إنها كبيرة .. هيعدي عليها وقت وتهون ..
كل وجع بتفتكره كبير وانه مش هينتهي .. بس في الآخر لازم ينتهي ..
من نعم ربنا علينا إن كتب علينا النسيان ..
شوف لما تكتب حاجة علي رمل البحر .. وبعد كدة يجي الموج يمسحه ..هو بالضبط .. هيجي الموج علي الحزن ويمسحه .. وهي دى رحمة ربنا ..
ما تخليش حزنك وألمك عائق لك .. بالعكس خليهم هما الطريق لبداية أحسن ..
الشئ اللي تزعل عليه بجد.. هو تقصيرك انت مع ربنا.. لأن ربك اللي خلقك الوحيد اللي مهما ابتعدت عنه مش هيرفضك..
واختم مقالى بالحكمه القائله:
- إذا نطق السفيه فلا تجيبه فخير من اجابته السكوت
فإذا حدثته فرجت عنه وان خليته كمدا يموت.
وأيضا المثل القائل:
لا تتسابق مع الحمير، لأنهم لو هزموك ستكون حمارا خاسرا..
ولو فزت عليهم، ستكون أفضل حمار.
والمثل الانجليزى:
-"لا تُصارع خنزيرًا في الوحل فـتتسخ أنت ويستمتع هو."
يعني لا تناقش، ولا تُعامل، ولا تُكلم، ولا تبرر ولا تشرح لأحد لا يُشبهك ولا يُـشبه مستواك، سواء الفكري أو الأدبي أو الاخلاقي.
يارب نفهم... تحياتى.