لازم لما نتكلم عن قداسة البابا نتكلم عنه بأدب واحترام وتقدير وكرامة .. وبلاش تمشوا ورا المضللين
فيه ناس غاوية إصطياد فى الماء العكر
البابا رأس الكنيسة ورمز المسيحية فى الشرق الأوسط
كتب - محرر الاقباط متحدون
أشادت مطرانية الشرقية والعاشر بتصريحات نيافة الأنبا رافائيل الأسقف العام لكنائس وسط القاهرة، ردا على ما يقال عن قداسة البابا تواضروس بخصوص إحتفال مجمع نيقية بدير الأنبا بيشوي.
وجاء بنص تصريحاته :"لما تلاقوا قرار طلع غلط، إبقوا وقتها إتكلموا، لكن مفيش حاجات طلعت من الكلام الغلط اللى بيتقال على قداسة البابا، البابا ليه 13 سنة على كرسى مارمرقس .. ومن وقتها بيقولوا البابا بيغير .. قولولى إيه اللى إتغير فى الـ 13 سنة دول.
لافتا:" "مفيش" .. لا قداس إتغير، ولا صلوات إتغيرت، ولا عيد ميعاده إتغير، ولا صيام إتشال، الناس اللى بتغـلط وبتشتم وبتـ.هاجم بالباطل، عايز أقولهم : أنتوا عايزين إيه ؟؟ عايزين نـار وتولـعوا الدنيا ؟؟.
مؤكدا :"قداسة البابا تواضروس مخلص للكنيسة وللإيمان الأرثوذكس ولشعبه،ده بابا الكنيسة يا جماعة، و إجتماع الطوائف المسيحية فى إحتفال "مجمع نيقية" بدير الأنبا بيشوي هو مجرد إحتفال فقط وليس حوار أو إتحاد، ومفيهوش أى إتفاقات أو معاهدات هنمضى عليها .. ده مجرد إحتفال زى ما بتعملوا أعياد ميلادكم بيحضر فيه كل أصحابكم من كل حتة بمختلف طوائفهم .. بلاش تمشوا ورا المـضللين.
مشيرا :"فيه ناس غـ.اوية إصطياد فى الماء العكر وتفسر تصرفات البابا والكنيسة بصورة وحـشة، ويقعدوا يتكلموا ضـده فى حاجات ميصحش تتقال، إحنا كأعضاء فى المجمع المقدس من مطارنة وأساقفة مش نايمين على ودانا .. ما إحنا مع قداسة البابا فى كل حاجة وشايفينها.
وتابع :" كنيستنا القبطية المصرية عضو عامل ومؤثر فى مجلس الكنائس العالمى منذ أيام البابا يوساب، وليها كلمتها وتأثيرها، وكنيستنا بتعمر ولينا قوتنا، واجتماع عالمى عندنا يعتبر أكبر دعاية لمصر وكنيستنا، ومصر بترجع مكانتها تانى عالميا، وشوفنا كلنا زعماء العالم إزاى إتجمعوا فى شرم الشيخ، وكلنا كنا فخورين ببلدنا .. وكمان بيدى إنطباع أن مصر بلد آمن.
لافتا :"الشيـطان مش عايز الكنيسة قوية وثابتة .. مش عايزها محبوبة .. ولازم تنتبهوا لكده، البابا رأس الكنيسة .. ورمز المسيحية فى الشرق الأوسط .. ولازم لما نتكلم عن قداسة البابا نتكلم عنه بأدب واحترام وتقدير وكرامة، شوفتوا الصعايدة في أسيوط عملوا معاه إيه ! وكم الحب والتكريم اللى شوفناه منهم وده الصح والمطلوب،كرامة لينا قبل ما يكون كرامة ليه ..وغيرنا لما يشوفوا كده يحترمونا لأن لينا كبير بيحترموه وبيحبوه.
وأشادت المطرانية بتصريحات نيافته وقالت :"يعيش فمك ولسانك الطاهر اللى نطق بهذا الكلام الجميل، نيافة الاسقف المحبوب الحبر الجليل الأنبا رافائيل.
