ديڤيد ويصا
ربّي ..
في أول يوم في ٢٠٢٦
جايلك شايل شويّة أحلام شاركتك بيها ..
أحلام لشُغلي وبيتي وخدمتي ..
إنت عارف الاحتياج اللي قُدّامه مسؤوليّة ..
وعارف كمان الشَّغَف اللي معاه السّعادة والفرَح!
--
أنا حاطط قُدّامك الاتنين، بكل تفاصيلهم ..
نفسي في السّنة الجديدة اقولّك من قلبي:
"لتكُن مشيئتك" ..
لكن كمان انت عارف مشيئتي وأحلامي!
ساعدني افهم مشيئتك واقبلها ..
وساعدني اقبل كمان طرقَك وتوقيتاتك!
--
أنا عارف ان شخصيّتي فيها عوائق كتير قُدّام مشيئتك ..
حاجات محتاج انك تقتلعها وتغرس بدالها حاجات تانية ..
حاجات وحشة لازم آخُد قراري واتخلّى عنها!
ساعدني!
--
داخل السَّنة، على غير العادة، متفائل ..
وواخد عهد على نفسي اجتهد في كل مجالات حياتي ..
مش عارف اجتهادي هيحقّق إيه من أحلامي ..
لكن ثقتي ان ثروة الإنسان الكريمة هي الاجتهاد ..
بطرح نفسي قُدّامك بأمنياتي وأحلامي ..
ومنتظر منّك تقويم وتشكيل وتعديل لكل شيء ..
عشان مش بس يتوافق مع مشيئتك وأحلامك ..
لكن كمان اكون سعيد ومبتهج وانا بتشكّل بين إيديك!
--
إنت عارف أحلامي اللي تخصّنا انا وانت ..
وعارف مخاوفي واللي بيشغل تفكيري ..
بين إيديك الكُل، لأنها أكبر وأحكم من إيدي!
آمين!
صلاة صليتها النهرده
ديڤيد ويصا
