ديڤيد ويصا
عُمرَك سمِعت الكلام ده من مديرك؟
أنا بمشي من الشُّغل متأخّر كل يوم، إنت ازّاي ماشي قبلي!
أنا بكمّل شُغل من البيت لحد بلّيل، ليه مش بتشتغل في البيت!
أنا بشتغل في الأجازة، يعني إيه مش هتشتغل في الأجازة!
--
طب سمِعت الكلام ده من صديق ليك؟
أنا متاح ليك علاطول، إنت ليه مش متاح ليَّ!
أنا برُد أول ما تبعتلي، ليه بتتأخَّر في الرد عليَّ!
أنا ببعتلك كل يوم، ليه مش بتبعتلي كل يوم!
--
طب سمِعت الكلام ده في علاقة عاطفيّة؟
أنا بتّصل بيك كل يوم، ليه مش بتتِّصِل بيَّ!
أنا ببعتلك رسايل طول الوقت، ليه مش بتبعتلي طول الوقت!
أنا ببقى عاوز/ه اسهر ارغي معاك كل يوم، ليه مش بتسهر!
أنا مسحت الرسالة بعد ٥ دقايق عشان انت مردِّتش عليَّ!
--
النوع ده من العلاقات، أقدر اسمّيه: علاقات مُرهِقة ..
فيها الطرف التاني عاوز يفرِض عليك حاجة طول الوقت ..
لمُجرَّد ان هو بيعمِل كده، فهو متوقّع منك انك تعمل زيُّه ..
بدون أي مراعاة لطبيعة شخصيّتك، مشغوليّاتك، ضغوطك ..
وبدون حساب لكونك مش المفروض انك تعمل زيُّه لأن انت مش هو ..
طرف محسِّسَك طول الوقت بالذّنب والضّغط والإلزام ..
وعايش حياتك مُضطَر تعمل حاجات مش عاوزها ولا قادر عليها ..
بسبب الضَّغط المُبالَغ فيه عليك وعدم احترام خصوصيّتك وشخصيّتك!
--
في العلاقة دي، اتعلِّمت اني اقول بوضوح:
أنا مش هقدر اعمل كده ..
أنا مش متاح اني اعمل ده ..
أنا مش مُضطَر اعمل اللي انت بتعمله ..
مينفعش تتوقّع مني اكون انت، لأن انا مش انت ولا ظروفي زيَّك ..
ولو الطرف التاني صمِّم يفضل كده ..
بسيب العلاقة دي بمنتهى راحة الضَّمير (لو صداقة مثلًا) ..
أو احدِّد المسؤوليّة اللي عليَّ بوضوح (لو خدمة مثلًا) ..
أو اسيب المكان اللي انا فيه واروح مكان تاني (لو شُغل)!
--
الطرف التاني هيزعل ويتّهمَك اتّهامات كتير ..
لكن مش مهم، لأن ابتزازه ليك على أساس اللي بيعمله ..
مش فَرض عليك عشان تعمل اللي هو عاوزه ..
والعلاقات مُفتَرَض فيها انها تبنيكوا انتوا الاتنين ..
والاختلافات مُفتَرض منها انها تقوّي العلاقة ..
والتوقُّعات من العلاقة مفيهاش افتراضات ..
لكن لازم تتبني على أساس اللي بتشوفه من الطرَّف التاني ..
مش على أساس اللي انت بتعمله للطَّرف التاني!
لكن لو العلاقة اتحوِّلِت لحِمل وتُقل مُرهِق، فهي بالتأكيد مؤذية!
ديڤيد ويصا
