سنة و ٦ أشهر !! .. د.مجدى إسحق
شكل من غير فايدة : فيه حاجات بتتباع فى السوق ، شكلها حلو قوى ، بس ما لهاش اى قيمة او أثر ..
برفيوم علبته تشدك ، و سعره حاجة ببلاش كده ، و تشم منه اول مرة "من زجاجة البياع !!" تلاقي ريحته مالية الدنيا.. و تروح تحط كل الزجاجة عليك، و ما تشمش منها الا شوية "سبرتو" لا يحوق و لا يدوم ..
و خد من ده كتير ..
فيه ناس شكلها حلو يشدك و يأسر عينيك .. و بعد كام مقابلة تكتشف انه فالصو ، كلام و بس لكن لا طعم و لا لون و لا فايدة و لا صدق و لا عمق و لا أمانة ..
و فيه العكس ، واحد اول ما تشوفه ما تستظرفوش و لا ترتاح له .. إنما هو أصيل و اصلى و حقيقي و كله خير .. ادي له بس شوية وقت تلاقي معدنه الجميل يبان !
ما تنخدعش فى حد ، و لا تتسرع، و لا تدى ثقة سريعة أو نفور سريع ..
و على راى المثل "لا تذم و لا تشكر قبل سنة و ٦ أشهر "
