قال ناصر ربيع المحام:"يوم 11 فبراير سنة 2011 الرئيس مبارك وصل شرم الشيخ بعد ما سلم كل صلاحياته للنائب عمر سليمان وفي نفس اليوم المشير طنطاوي اجتمع مع اللواء عمر سليمان والفريق أحمد شفيق في مبنى وزارة الدفاع علشان يشوفوا هيعملوا إيه في المظاهرات اللي جاية على القصر الرئاسي
فاللواء عمر سليمان قالهم : الرئيس سافر بعد ما فوضني في صلاحياته لكن الإخوان مصممين يسقطوا النظام تماما ومش عاوزين انتقال سلمي للسلطة وأنا خايف من فوضى كبيرة لو اقتحموا القصر.
مضيفا عبر حسابه على فيسبوك:"فالمشير قاله : أنا أعطيت تعليمات للحرس الجمهوري ميستخدمش العنف لكن الساعات الجاية محدش عارف ممكن يحصل فيها إيه فعمر سليمان رد وقال : يبدو إن الحل الوحيد تنحي الرئيس عن الحكم تماما
وهنا أحمد شفيق قاله : يا عمر بيه أنا بقترح إنك تكلمه وتقنعه بالتنحي وأنا واثق إن الرئيس لما يعرف الوضع هيستجيب فورا.
فاللواء عمر بص للمشير طنطاوي اللي قال : أنا مع الاقتراح ده. ولازم الموضوع يتحسم، وحصل فعلا وعمر سليمان مسك التليفون واتصل بالرئيس مبارك وقاله : الأوضاع بتسوء يا ريس ولازم نشوف حل
ومبارك سأله : فيه إيه تاني؟ أنا سبت القاهرة وفوضتك في كل صلاحياتي.
عمر سليمان رد : لا.. الوضع صعب جدا، فالرئيس قاله : أنا قدمت كل اللي عندي والسلطة معاك والبركة فيك فاللواء عمر رد وقاله : الناس رافضة التفويض يا ريس وناويين يزحفوا على القصر الجمهوري
الرئيس مبارك سأله : طب والباقيين رأيهم إيه؟
عمر سليمان قاله : ده رأي جماعي
وأنا موجود وجنبي المشير والفريق شفيق وكلنا متفقين على ضرورة التنحي الكامل
فمبارك قاله : طيب إذا كان مفيش غير كده
فابعتلي التليفزيون واكتب الصيغة عشان أقولها في خطاب قصير للناس
عمر سليمان رد : مفيش وقت يا ريس وأنا خايف البلد تدخل في بحور من الدم أرجوك يا ريس عاوزين نخلص
الرئيس قاله : إنت عارف يا عمر أنا ولا عاوز موت ولا عاوز دم أنا سبت كل حاجة وجيت شرم الشيخ
شوفوا الصيغة المطلوبة وقولي وانتهت المكالمة.
واللواء عمر سليمان قال للمشير والفريق شفيق : الرئيس معترضش على حاجة الراجل خايف على البلد وكان متجاوب رغم قسوتي عليه.
لافتا :"وبعد مناقشات استمرت حوالي ساعة اتفقوا إن الحل الوحيد هو تنازل الرئيس عن السلطة للمجلس الأعلى للقوات المسلحة.
وبعدها اللواء عمر سليمان اتصل بالرئيس مبارك وأللي وافق على المقترح وطلب تبديل كلمة تنحي وتبقى تخلي وإن البيان يذاع بعد ما السيدة سوزان وجمال وعلاء يوصلوا شرم الشيخ عشان محدش يإذيهم
واللواء عمر سليمان قاله : حاضر
وسأله : سيادتك ملكش أي طلبات تانية ؟
فالرئيس مبارك رد : مش عاوز أي حاجة خلوا بالكم من البلد
عمر سليمان قاله : إيه رأيك يبقى عندك حصانة قضائية؟
فمبارك قاله : حصانة قضائية ليه؟ هو أنا عملت حاجة؟ أنا ستين سنة وأنا بخدم مصر مش عاوز أي حصانة ولو كان فه حاجة غلط عملتها أنا مستعد للمحاسبة.
فعمر سليمان قاله : طيب مع حضرتك مهلة أسبوع للتفكير الرئيس مبارك رد بحسم : ولا أسبوع ولا غيره أنا قاعد في مصروبعدها بحوالي ساعة ونص اتنحى والمجلس العسكري مسك السلطة ومن تاني يوم بدأ اجتماعات مع القوى السياسية وحكي الدكتور رفعت السعيد، رئيس حزب التجمع في مذكراته إن بعد التنحي بيومين قابل مجموعة من أعضاء المجلس الأعلى للقوات المسلحة منهم اللواء عبدالفتاح السيسي والسيسي اتكلم أول واحد وسأل رفعت السعيد : نتصرف إزاي مع مبارك ؟ مع اعتبار إننا محترمين وضعه كقائد أعلى سنين طويلة وبنحترم دوره في حرب أكتوبر وبنحترمه ككبير لينا.
فرفعت السعيد رد وقال : سيبوه يسافر من شرم الشيخ للسعودية. هنا السيسي قاله بصوت عالي : مش راضي ومصمم يفضل موجود هنا وبيقول أنا متعودتش أهرب ومرتكبتش أي خطأ ومش هسيب مصر فرفعت السعيد استغرب ومعلقش
لكن ده اللي حصل بالفعل والرئيس مبارك فضل في مصر واتبهدل في المحاكمات بتحريض من الإخوان لحد ما خد براءة ومات مرفوع الراس وهما اللي رجعوا السجن وربنا يرحم الجميع عاشت مصر حرة قوية آبيه وتسلم الايادي تحيا مصر .
