كتب - محرر الاقباط متحدون
قالت سيدة تُدعى إنجي وليم إن شخصا يعمل "سايس" اعتدى عليها بالضرب المبرح في منطقة مسجد عمر بن عبدالعزيز بمحافظة بني سويف، ما أسفر عن إصابتها بكسر في الأنف إلى جانب إصابتها بعدة كدمات.
وكتبت إنجي عبر حسابها على فيسبوك :"مساء الخير ،انا انجي دلوقتي انا عايزة احكي على موقف حصل معايا يوم التلات الموافق 10/2 الساعه 7 ونص مساء بظبط وانا بركن عربيتي عند مسجد عمر ابن عبدالعزيز عند المحكمه القديمه وعند كشك احمد الابيض في بني سويف واللي عارف المنطقه دى ، عارف انها مش باركينج ، ظهر لى شاب كدا شغال سايس ، من البداية خالص بيرازيني علشان الركنه قولتله ثواني وراجعه ومعنديش مشكله خالص فى فلوس الباركينج ولا كانت هتفرق معايا ، وبعدين رجعت أخد حاجه من العربية وراجعه تاني لقيته وقف لى عند الشباك ومربع لى أيده واللي هو فِرده عليا، وخبط لى على الكبوت وقالى طيب شيلي العربية دى بدل ما اكسرهالك ، لسه صاحبتي بتقوله هتكسرها ازاى يعني ف بدأ يقاوح بالكلام معاها وصوته بقي عالي.
مضيفة :"مردتش ارد عليه وحاولت اتلاشي الموقف وبعدين خوفت احسن يعمل حاجه فالعربية فعلا ف طلعت الموبايل علشان اصوره ، اتهجم عليا وزاحني وكان عايز ياخد الموبايل شلت الموبايل ،ضربني بالبوكس فوشي و دوخت جدااا و مبقتش شايفة وروحت المستشفي اكتشفت اني مناخيري فيها كسر وكدمات شديده ف عيني، والاسوأ من كدا أنه كان لسه هيكمل وكان هيطلع سلاح أو حاجه من جيبة لولا الناس اتلمت وهو بكل بجاحه بيقول امشوا من هنا بدل ما اقتلك وحتي زميلتي اللي كانت معايا بردو حاول يتهجم عليها وهي بتبعده عني أو تحاول تصوره.
وأضافت :"كل اللي عملته روحت عملت تقرير طبي وعملت محضر وقدمت الفيديوهات دى فى CD مع المحضر ولحد الان مظهرش ولا حد من اللي عارفينه راضي يساعدنا ويقول حتي اسمه الكامل ، انا لحد الان مش عارفه اخد حقي ومش عارفه انزل الشارع ، هو انا ايه عملته يخليني اعيش الظروف دى وماخدش حقي ؟! انا حتي مردتش عليه ؟! وهل ينفع انى اتضرب ف وسط الشارع باالمنظر دا !!بسبب ركنه عربية وياريتها ف ملكه ؟ وحتي لو ف ملكه هل طبيعي دا يكون رد الفعل ؟ الالم اللي حسيته والاهانه وقلة القيمه اللي حصلت فالشارع من بلطجى وفالاخر عايش حياته عادي جدا! دا طبيعي تكون حياة بنت ف يوم طبيعي ؟؟ ، انا مش عارفه اخد حقي أقل حاجه عنه ، حتي اسمه الثلاثي محدش مساعدني فيه وكل اللي عرفته أنه لقبه م الدكش ورقم المحضر ٢٨٢٠، شيروا البوست لو سمحتم وساعدوني انا مش عارفه ازاي الموضوع يوصل لوزاره الداخليه ، انا بجد مش عارفه انام ولا احس بأمان طول ما هو فالشارع كدا.
