كتب - محرر الاقباط متحدون
علق المفكر والطبيب خالد منتصر على الردود ذات الطابع الديني في إطار الجدل الذي أثاره الدكتور الراحل ضياء العوضي، حول الاكتفاء بضبط النظام الغذائي كبديل للعلاج الطبي.
وكتب منتصر عبر حسابه على فيسبوك :"ما فيش فايده..لا جدوى!! لسه الناس فاكرينها معركة دينية، العوضي قال آية ، حارد بآيتين، ذكر حديث هيقدموا خمسين حديث، غلف الطب بسيلوفان ديني، هيقدموه في ورق هدايا اعجازي ديني مصقول وملون كمان!!.
وتابع:" هو انتم ما بتفوقوش..ما بتتعلموش!؟؟، لسه ما عرفتوش ان سبب الكارثة هو خلط العلم بالدين، وبيع البضاعة العلمية في محلات البخور، ودكاكين التوحيد والنور؟؟!، والمصيبة ان اللعبة دي ، العوضي هو اللي حيكسبكم فيها، لإن الدراويش عايزين يصدقوه، المعركة طبية وعلمية، وتفنيدها يبقى بالطب والعلم، الجرجرة لساحة التراشق بالنصوص الدينية في مسألة طبية غير مجدي، وغير منطقي، وغير عقلاني، وغير عملي، عامل زي ما تكون عايز توزن بالكيلو متر، وتقيس بالكيلو جرام، زي ما تكون عايز ترسم لوحة بقوس كمان، أو تعزف بريشة رسم!!، ده مجال وله أدواته ومهامه، وده مجال تاني خالص له أدواته ومهامه، ومش معنى اني ما باستخدمش واحد منهم مع التاني، ان فيهم واحد وحش، لعلم نسبي ومهم للبحث والتفنيد في مشاكل الواقع ، والدين مطلق ومهم للطمأنينة النفسية لمواجهة مشاكل الميتافيزيقا والغيبيات، كل واحد له حتته، والخلط بينهم يضر العلم والدين على السواء.
وواصل:"نعمل ايه عشان تتعلموا ان الخلط ده هو اللي في ودانا في داهية في حاجات كتير، منها زرع الأعضاء، والختان، وتطبيق نظام الطيبات البي كان نتيجته ضحايا مرضى السكر والكلى والأمراض المناعية..الخ، امتى في مصر حنقتنع بإن الناس بره ما اتقدموش بالدروشة وحلقات الذكر ورص النصوص الدينية لدعم العلم، وتقديم النظريات في أحجبة ، اتقدموا بالمعامل، وبالمعادلات الباردة الصارمة، وبالشك وبالسؤال، وبالتفنيد في المجلات والمؤتمرات، وباحترام العلماء اللي بجد ، ما تعرضوش الدين المطلق للاختبار على طاولة العلم المطلق، وتمرروه من أنابيب اختباره، صدقوني حتخسروا، لإنكم حتلاقوا معسكر الأغلبية حيتمسك بالتفسير الحرفي وعايز لسه يحارب برباط الخيل في القرن الحادي والعشرين، ويتعالج بالعسل وحبة البركة و السبع تمرات في زمن العلاج الجيني، والناس بتطلع المريخ، وهما لسه مصرين يشوفوا الهلال بالعين …الخ .
وأضاف:"وحتخسروا معاكم العلم اللي عشان يتقدم عايز حرية وجسارة سؤال، وعدم وجود قيود مسبقة عليه من عمائم أو ما شابه،العلم يناقش ويحل ما هو على الأرض، ولا علاقة له بأسئلة السماء.العلم مهمته يعيشنا كويس قبل الموت، ومش شغلته خالص حنعمل ايه ونتحاسب ازاي بعد الموت.
