د. بولا وجيه.
أصعب نوع تعب هو التعب اللي بيبان للناس دلع.
لما ترفض خروجة لأنك مرهق نفسيًا، يقولوا إنك معقد. لما تختفي شوية علشان تهدى، يقولوا إنك اتغيرت. ولما تبطل تتحمل نفس الضغوط القديمة، يتهموك إنك بقيت حساس زيادة.
في مجتمعاتنا، الناس بتحترم التعب اللي له صوت وشكل واضح. شغل، جري، مسؤوليات. لكن نادرًا ما حد يفهم إنك ممكن تكون منهك من التفكير، من العلاقات، من الضغط المستمر إنك تبقى متاح ولطيف ومتزن طول الوقت.
المشكلة إنك أحيانًا بتضغط على نفسك أكتر علشان تثبت إنك بخير، لحد ما جسمك وعقلك يقرروا يقفوا غصب عنك.
الراحة مش رفاهية. والاختفاء المؤقت مش خيانة للناس. أوقات كتير بيكون محاولة أخيرة علشان تنقذ نفسك قبل ما تنهار بالكامل.
السؤال المهم: إمتى آخر مرة سمعت احتياجك للراحة… بدل ما تحاكم نفسك عليه؟
