الإيبوذياكون د. بولا وجيه... الخوف من الوحدة
فيه ناس بتكمل في علاقات مؤذية مش حبًا فيها… لكن خوفًا من الفراغ بعدها.
تستحمل الإهمال، التقليل، والبرود، فقط لأن فكرة البداية من جديد مرعبة. فتقنع نفسك إن “أي علاقة أحسن من الوحدة”، لكن الحقيقة إن الوحدة أحيانًا أرحم بكتير من وجود بيكسرك كل يوم.
الخوف بيخليك تتعلق بأقل اهتمام، وتفسر أي لحظة حلوة كأنها دليل إن العلاقة لسه تستحق. مع إنك من جواك عارف إنك تعبان طول الوقت.
المشكلة إن الاعتياد قوي جدًا. الإنسان ممكن يتعود حتى على الأذى، لدرجة يحس إن غيابه هو الألم الحقيقي.
لكن الحياة مبتقفش بعد حد. والراحة النفسية اللي بتيجي بعد قرار صعب، أحيانًا بتعوض سنين من الاستنزاف.
مش كل نهاية خسارة. فيه نهايات بتنقذك من نسخة مرهقة من نفسك كانت بتحاول تعيش بأي ثمن.
اسأل نفسك بصدق: أنت متمسك بالشخص… ولا متمسك بخوفك من أنك تفضل وحدك؟
