قال الكاتب محمد أبو قمر :"لكل من اسرائيل وإيران وأمريكا مشاريع بخصوص المنطقة، أمريكا لها أطماع في كل دول المنطقه بما في ذلك إيران ذاتها، واسرائيل لها مشروع معروف ومُعلن من زمان ، وطبعا المعتوه مبيكونش عارف إنه معتوه، وإيران برضه لها مشروعها للهيمنة علي كل دول المنطقة، ودا واضح وضوح الشمس ، لكن إحنا في مصر عندنا شوية أفنديه مش شايفين إللي عملته إيران في العراق أو في اليمن أو في لبنان ، أو في سوريا .
مضيفا عبر حسابه على فيسبوك :"عموما إللي شايف إن إيران بتاع مقاومه وتحرير فلسطين وكل الأونطه بتاع جبهة الصمود دي هو حر ، بس إللي بياكل من الأونطه ميحاولش يأكل حد غيره منها، المهم الحرب إللي شغاله دي إللي جماعتنا فاكرين إنها بخصوص فلسطبن هي حرب تنافسيه بين أصحاب المشاريع التلاته، وإللي مش شايف إنها حرب بين 3 مشاريع للهيمنه علي المنطقه هو حر وإن قضية فلسطين مش في مخيلة ولا ذهن أي طرف من الأطراف التلاته خصوصا إيران ، كل واحد حر يشوف إللي يشوفه .
أنا حر وإنت حر ، أنا مش بفرض عليك إللي أنا شايفه ، وإنت كمان متحاولش تفرض عليا إللي إنت شايفه ، خصوصا لما تكون حضرتك واكل لوبيا.
قضية فلسطين طول عمرها الورقه إللي بيلعب بها أصحاب المشاريع في المنطقه.
وتابع :" لبنان مش بتنضرب علشان فلسطين ، ولا حزب الله حزب مقاومه ، لبنان ضحية الصراع بين مشروع اسرائيل ومشروع إيران ، وحزب الله واخد لبنان رهينه لحساب إيران تحت دعوي المقاومه ، وأرفق لك فيديو يوضح لك مشروع حزب الله في لبنان علشان تبطل تقولي إن الحزب ده حزب مقاومه.
- والعراق ضحية الصراع بين مشروع أمريكا ومشروع إيران، وسوريا ضحية الصراع بين مشروع إيران ومشروع تركيا ومشروع اسرائيل ومشروع أمريكا، واليمن ضحية مباشره للمشروع الإيراني للتحكم في باب المندب،والخليج كله محل طمع إيران واسرائيل وأمريكا وكل القوي الأخري المشغولة بثروة الخليج ، وكل قوه من القوي دي بتمارس الصراع حوالين الخليج بطرق مختلفه .
إللي شايف بأه إن إيران مشغوله بفلسطين وعايزه تحررها هو حر ، قضية فلسطين أصبحت قضية عاطفية كل صاحب مشروع في المنطقه بيرفع القضية دي علشان الإخوه العاطفيين محدش منهم يشوف حقيقة المشروع المستخبي ورا العواطف .
لافتا :"يعني في الفيديو المرفق ده حسن نصرالله بيقول إن مشروع حزب الله هو العماله لحساب إيران للاستيلاء علي لبنان وضمها لإيران ، يعني هو بيقول علي نفسه إنه عميل لإيران ، إنما حضرتك عايز تجبرنا إننا نقول إنه حزب مقاوم ضد اسرائيل لتحرير فلسطين ، لأ أنا هاعتبره زي ما هو بيقول عن نفسه.
إنت شايف غير كده ، كويس ، إنت حر ، خليك فاتح عينيك علشان ياما هاتشوف.
