الإيبوذياكون د. بولا وجيه يكتب: "القلب اللي بيدوّر على ربنا"
«بِكُلِّ قَلْبِي طَلَبْتُكَ» (مز 119: 10).
في أوقات كتير بنجري ورا حاجات بنفتكر إنها هتفرّحنا أو تريحنا، لكن بعد ما نوصل لها نكتشف إن لسه في فراغ جوانا. الحقيقة إن القلب مبيحسش بالشبع غير بوجود ربنا، وعشان كده مفيش حاجة تقدر تملأه غير حضوره.
لما الإنسان يطلب ربنا بكل قلبه، مش مجرد كلام أو شعارت أو وقت قليل وقت الضيق، لكن باشتياق حقيقي، بيلاقي إن ربنا دايمًا قريب منه.
يمكن المشاكل ماتخلصش في لحظة، ويمكن الظروف ماتغيرش بسرعة، لكن اللي بيتغير فعلًا هو القلب اللي بيتملي سلام ورجاء وقوة.
ربنا عمره ما خيّب حد راح له بإخلاص. يمكن مايدّيش الإنسان كل اللي هو عايزه، لكنه بيدّيه دايمًا اللي محتاجه. وعشان كده نقدر نقول بثقة: القلب اللي بيدوّر على ربنا عمره ما يرجع فاضي، لأنه أكيد هيرجع شايل بركة أو تعزية أو إجابة أو حتى حضور ربنا نفسه... وده أعظم عطية ممكن ياخدها إنسان.
