خد اللي نفسك فيه.. د. مجدى إسحق 
يا خوفى لو خدت اللي طلبته و جريت وراه طول عمرك!! 

اشتهيت الفلوس؟؟ طيب خد فلوس لما تغرق فيها و تتعمي من كترها، ومش كتير على ربنا انه يديك اي حاجة وكل حاجة !! 

افرح لك بيها يومين، بس ياخوفي لتنسي مبادئك و أخلاقك و تغرق فيها : تكتر مشاكلك و خناقاتك ، و تنسي عيلتك و أولادك ووالديك، و تضيع صحتك و عافيتك.. 

بقى معاك فلوس بس خسرت راحة البال، و حب الناس و خسرت النور الالهي اللي ح يوصلك للسماء.. 

بالمثل عاوز مركز مرموق ؟؟ خد يا عم المركز اللي انت عاوزه بس خد معاها عذاب وخناقات ومشاكل ما تنتهيش.. 

عاوز واحدة رائعه الجمال او او عايزه واحد غني جدا؟؟ خد يا عم اللي في نفسك واشرب وعيش بقيه حياتك متعذب في جمال من غير حب ولا روح ولا تفاهم ، أو مع واحد غني يتعب قلبك طول عمرك !! 

يعني ما تطلبش من ربنا حاجة ؟؟ 

عاوز الحق : قوله اديني اللي يرضيك قبل اللي يرضيني.. و احميني من طلبات شايفها مفيدة لكن تضلنى.. اديني مشيئتك قبل مشبئتي انك انت اللي عارف راحتي فين وسلامي يجي منين.. 

وصدق داود كاتب المزامير عندما قال : فَأَعْطَاهُمْ سُؤْلَهُمْ، وَأَرْسَلَ هُزَالاً فِي أَنْفُسِهِمْ. ( مزمور ١٠٦: ١٥)