ماجدة سيدهم
انتشار جرايم العنف والقتل داخل الأسرة والإنتقام من الإطفال نكاية في أحد الأبوين  وتفشي حالات التحرش والاستغلال وتعدد العلاقات المشبوهة كلها ترجع للهوس بشهوة الجنس 

خاصة وأن البيئة أصبحت من سنين  خصبة جدا ( تحريم الفنون ..جهل ..وفقرشديد ..ادمان وقمع  و..و.. ) لممارسة كل المبوقات والمفاسد الأخلاقية غير المسبوقة فخلقت أجيال مهزومة إنسانيا لاتصلح حتى لأعمال إرهابية حتى لو مأجورة  ..

طيب بالله عليكو مجتمع متحرم عليه العيشة بحجة الاكتفاء بكل مظاهر التدين ونجحوا يشكلوا المجتمع بالحماقة والعنف وانعدام التربية فمنتطرين منه إيه ومنتظرين من أفراده أي مستقبل  ..؟!

 دول من ملايين مخيفة جدا ..لا في دماغهم دين ولا طموح  ولا نجاح ولاكرامة ولاانتماء لأسرة ولا وطن ولا حاجة خالص ..أي واحد منهم  عاوز قرشين بأي وسيلة يكفي يومه ويخلص أزمته مع أي بنت يتحرش بيها أو يغتصبها حتى لو بنته أو خطيبته أو أخته أو جارته مش فارقة معاه ..وشفنا جرايم من دي كتير ..
وفيه منهم اللي شايف نفسه أعلى شوية فماشي مع هوجه الالحاد المنتشر دلوقتي بحجة التحرر على كلمتين سمعهم ..مع ضغط وكدب كتير من المشايخ اللي خنقته من غير تفسير مع فقر مدمر ..وفي الآخر  هو برضه ممزق ومنفصل عن نفسه وعن الحياة ..يعني ميت 
 
وبعدين تطلع اقترحات عن المساكنة أو بتصريح لتقنين بيوت الدعارة كمحاولة لتخفيف من حدة مصيبة الشارع اللي ماعاد آمان لأي بنت ولاحتى لقطة  معدية ..لكن الحقيقة إن كنا إحنا  فاشلين في الزواج أبو قايمة ومهر وزفة تسد عين الشمس هاننجح في  الدعارة ..؟! 

ثانيا هو مين اللي هايروح البيوت دي ...ميسور الحال مسلك نفسه فمش محتاج لها ..حتى السرسجي المعدم  واللي مش لاقي ياكل ودول فئة  من ١٢ و١٣ سنة وأنت طالع لحد ال٥٠ ومعدي  دا يدفع ليه ؟!  ما التحرش والاغتصاب والعلاقات الموبوءة أرخص له ومتوفرة ومش هاتكلفه مليم واحد حتى لو فيها إعدام.. ماهو كدا كدا هو عارف أن مالوش لازمة في الدنيا  ..

وفيه طبقه مزيفة من بتوع الدين وربنا والقيم ودول بيعملوا 
كل البلاوي بس في السر ..فبيوت الدعارة هاتفضحهم وتكشف سترهم ..

النظرة للجنس في مجتمعنا في حدا ذاتها عبارة عن شهوة فاسدة ..وأي كائن مؤنث ولا حتى مذكر (المتاح فورا )  هو مش أكتر من أداة  لفك أزمة جنسية ملحة بأي مكان  فياترى 

التعامل مع  فتيات هذه المهنة  هايكون ازاي ؟! 
أكيد هاتحصل جرايم وانتهاكات وكوارث مالهاش حد ..
   في العموم لا مساكنة ولاتقنين لبيوت الدعارة هي الحل ..

الحل في اللجوء فورا لتفعيل شتى الفنون لإنقاذ شعب يتآكل من داخله لتفشي سمومه  وقارب على الانفجار ..ودا مشروع دولة ..قلبها  شجاع وطهق من كتر الفساد والكدب اللي فىالشارع وشايفة ان الخراب اللي جاي أخطر ومش هايرحم حد ..دولة تنسف كل فكر ووكر وحصن يدعم التخلف والجهل والكبت وكل فساد أخلاقي  ..تنسف من غير خوف ولاحساب لحد  مهما كان شأنه ..الكل أدام المساءلة اللي بتفرم بيخاف وبيرجع ورا ..وبعدين تبني بجدية على نضافة بفرض القانون وثورة لإنتصار الفنون فوق كل شيء وهاتظبط بعدا كدا ..ماحنا جربنا وأدينا بنحصد ..