الإيبوذياكون د. بولا وجيه يكتب: "المُعزّي الحقيقي"
«أَنَا هُوَ مُعَزِّيكُمْ» (إش 51: 12).
في لحظات بيبقى القلب محتاج كلمة تطمنه، أو حضن يريحه، أو حد يحس بوجعه. لكن مش دايمًا بنلاقي الشخص اللي يقدر يعمل ده. ساعات الناس بتحاول تواسينا، لكن مهما كانت محبتهم كبيرة، في وجع جوا القلب محدش يقدر يوصله.
عشان كده، ربنا قال بنفسه: «أَنَا هُوَ مُعَزِّيكُمْ». هو الوحيد اللي يقدر يدخل لأعمق مكان في القلب، ويشيل حمل محدش شايفه، ويداوي جرح محدش يعرف إنه موجود. تعزيته مش مجرد كلام حلو، لكنها سلام حقيقي يهدّي النفس، وقوة تخلي الإنسان يكمل رغم كل التعب.
يمكن اللي حواليك مايفهموش سبب دموعك، ويمكن تحاول تشرح وماتعرفش توصل اللي جواك. لكن مع ربنا، مش محتاج تشرح كتير. هو عارف كل حاجة قبل ما تنطق، وحاسس بكل تنهيدة طالعة من قلبك.
لو حاسس النهارده إنك مكسور أو متعب، قرب من ربنا. افتكر إن اللي خلق قلبك هو أكتر واحد يعرف يريحه. يمكن محدش عرف يطبطب على قلبك، لكن ربنا يعرف يوصل للمكان اللي محدش يقدر يوصله، ويملأه سلامًا وتعزية لا يقدر العالم يديها.
