كتب - محرر الاقباط متحدون
وجه الكاتب محمد أبو قمر رسالة بعد منشورات الإعلامية دينا المصري، التي تضمنت إساءة إلى الأقباط المسيحيين وطقوسهم الدينية،ما أدى إلى وقف برنامجها "حواديت على المكشوف" الذي كان يُذاع على قناة المحور.
وكتب ابو قمر عبر حسابه على فيسبوك:" الإساءه للمصريين من ديانات أخري غير الإسلام مش مجرد ازدراء للدين ، ولا هي مجرد إساءه ، ولا حتي عنصرية ، ولا يمكن اعتبارها نوع من أنواع الطائفيه ، موقف الإخوان والسلفيين والمتزمتين والمكفراتيه من الديانات الأخري يُعتبر خيانه لأن الإساءه أو التكفير هو تمزيق المجتمع يعني الهدف من الانحطاط ده هو إضعاف الوطن بإشاعة الفرقه والكراهيه والفوضي حتي يسهل تمزيق الوطن لصالح من يريدون تقسيمه إلي دويلات حسب الدين أو الطائفه.
لافتا:"المدرس إللي بيعلمنا أحيانا بيكون مسيحي ، صاحب المصنع إللي عماله كلهم مسلمين أحيانا بيكون مسيحي ، الصديق إللي ممكن يبقي أصدق من الصديق المسلم أحيانا بيكون مسيحي ، الطبيب الناصح إللي بيعالجنا أحيانا بيكون مسيحي ، الجندي المسيحي بيحارب بنفس الروح بجوار زميله الجندي المسلم لحماية الشعب إللي أغلبه من المسلمين ، المسيحي بيدفع ضرايب زي المسلم ، المواطن المسيحي عليه نفس واجبات المواطن المسلم تجاه البلد.
وأضاف:" إللي بيكفر المسيحي خاين ، وإللي بيسيء للمسيحي خاين ، عدونا بيجند جواسيس بهدف إضعاف البلد وتخريبها من الداخل ، واعتقد مفيش أي فرق بين الجاسوس وبين إللي بيسيء لأي مواطن مصري من ديانه أخري.
