الإيبوذياكون د. بولا وجيه يكتب: "لما تفتكر مين إلهك"
«الإِلَهُ الْقَادِرُ عَلَى كُلِّ شَيْءٍ» (خر 6: 3).
ساعات المشكلة بتكبر في عينينا لدرجة إننا ننسى إن في إله أكبر منها. نبص على الظروف، ونشوف إن مفيش حل، وإن إمكانياتنا قليلة، فنحس بالعجز وقلة الحيلة. لكن أول ما نفتكر مين هو ربنا، حاجات كتير بتتغير جوانا.
ربنا مش محدود بإمكانياتنا، ولا بالأبواب اللي شايفينها مقفولة. هو قادر يفتح طريق من مكان مفيهوش طريق، ويغير ظروف شكلها مستحيل تتغير، ويدخل في اللحظة اللي إحنا بنكون فيها فاقدين كل أمل.
وده مش معناه إن كل مشكلة هتتحل فورًا بالشكل اللي إحنا عايزينه، لكن معناه إن مفيش مشكلة أكبر من قدرة ربنا، ومفيش ظرف خارج عن إيده.
يمكن النهارده واقف قدام حاجة حاسس إنها أكبر منك، ومش عارف تعمل إيه. قبل ما تستسلم لإحساس العجز، ارفع عينك لربنا وافتكر إنه قادر على كل شيء.
عجزك وقلة حيلتك قدام أي مشكلة بينتهوا بمجرد ما تفتكر إن إلهك قادر يغير كل حاجة في لحظة.
