الإيبوذياكون د. بولا وجيه يكتب: "إنت مش بتحارب لوحدك"
«الرَّبُّ إِلَهُكِ فِي وَسَطِكِ جَبَّارٌ. يُخَلِّصُ» (صف 3: 17).
ساعات وإنت في وسط المشكلة بتحس إنك لوحدك، وإن الحمل كله على كتفك، وإن مفيش حد قادر يفهم حجم اللي إنت بتمر بيه. لكن الحقيقة اللي لازم تفضل فاكرها إنك مش بتحارب لوحدك. ربنا موجود في وسط المعركة، شايف تعبك، وعارف خوفك، وقادر يسندك في الوقت اللي إنت فيه مش قادر تسند نفسك.
وجود ربنا معاك مش معناه إنك مش هتعدي بضيق، لكن معناه إن الضيقة مش هتكون أقوى منك، لأن اللي معاك أقوى من أي حاجة بتحاربك. هو قادر يديك قوة تكمل، وحكمة تاخد بيها القرار الصح، وسلام يحفظ قلبك حتى لو الظروف لسه زي ما هي.
يمكن تكون شايف المشكلة أكبر من كل إمكانياتك، ويمكن تكون مش عارف النهاية هتكون إزاي، لكن ماتنساش إن ربنا مش بس واقف جنبك، ده هو قادر يخلّصك، ويفتحلك طريق وسط الحاجة اللي كانت خانقاك.
اطمن، إنت مش لوحدك. ربنا في وسطك، جبار في قوته، وقادر يحوّل وقت الضيقة لوقت تشوف فيه أمانته بعينيك.
