ماريان فايز
هل فكرت قبل كده إن علاقتنا بالمال ممكن تحكي عن حاجات أعمق بكتير من قدرتنا على الصرف أو التوفير؟
فيه ناس بتشوف الفلوس وسيلة للاستمتاع بالحياة، وناس بتشوفها أمان للمستقبل، وناس ممكن تتمسك بيها لدرجة إن فكرة إنفاقها أو مشاركتها مع حد تاني تثير جواها خوف أو قلق.
فهل الإنسان متمسك بالمال لأنه بيحبه؟ ولا لأنه اتعلم إن امتلاك المال هو طريقته الوحيدة عشان يحس بالأمان أو يحافظ على سيطرته؟
يمكن وراء بعض تصرفاتنا المالية حكايات أقدم من الفلوس نفسها… حكايات عن الحرمان، والخوف من الاحتياج، وتجارب علمتنا إن اللي معاه فلوس هو اللي يقدر يحمي نفسه.
وده مش معناه إن كل شخص حريص على فلوسه عنده مشكلة نفسية، لكن معناه إن علاقتنا بالمال تستحق نفهمها، بدل ما نحكم عليها بسرعة.
في الفترة الجاية، هنتكلم عن علاقتنا بالمال من منظور نفسي وإنساني : إزاي بتتكون؟ وإيه اللي بيحركها جوانا؟ وإمتى الحرص بيكون حكمة، وإمتى ممكن يتحول لخوف أو سيطرة أو بخل يؤثر على علاقاتنا؟
ليه انا مهتمة بده....علشان في المشورة الزوجية، من الموضوعات اللي بتتكرر الخلافات حولها: الفلوس.
مين بيصرف؟ مين بيشارك؟ مين بيقرر؟ وهل إحنا متفقين على معنى الأمان والاستقرار المادي؟
ولأن الخلاف اللي بيبدأ بسؤال: إنت صرفت الفلوس في إيه؟ ممكن يكون وراه سؤال أعمق: هل أنا شريك حقيقي في حياتك؟ وهل أقدر أحس بالأمان معاك؟
فالفلوس مش دايمًا هي المشكلة كلها… أحيانًا بتكون المكان اللي بتظهر فيه مشكلات أعمق بين اتنين.
أحيانًا الخلاف مش على الفلوس اللي اتصرفت… لكن على الأمان والعدل والثقة اللي المفروض يكونوا موجودين بين اتنين.
وسؤالي ليك في بداية رحلتنا:
لما بتفكر في الفلوس، إيه أول إحساس بيجيلك؟ الأمان؟ الحرية؟ الخوف من المستقبل؟ ولا القلق من إن اللي معاك ممكن ما يكفيش؟
شاركني رأيك…ولو مهتم اكتب هنا متابع وشير علشان الموضوع يوصل لكثير بيعانوا منه بدون فهمه
لأن أحيانًا فهم علاقتنا بالفلوس بيبدأ من فهم إحساسنا ناحيتها.
ماريان فايز | علشانك للمرأة
