لكثرة الاحتفالات الخاصة بالمرأة، سواء عالمية أو مصرية، قرر بعض أصحاب المحال المختلفة إحياء اليوم العالمى للرجل الذى يوافق اليوم 19 نوفمبر، بتقديم خصومات وعروض خاصة للرجال فقط، فى مبادرة أطلقوا عليها «يوم الدلع والتوفير».
حب الرجال للجلوس فى المقاهى، دفع أحمد جمال، صاحب مقهى فى محافظة الإسكندرية، إلى تقديم عروض مشروبات مجانية للرجال خلال اليوم: «إحنا قررنا نحتفل بالزبائن بتوعنا، هما بيعتبروا القهوة بيتهم التانى وإحنا قُلنا نقدرهم وندلعهم فى اليوم ده ونهون عليهم متاعب الحياة، ونوفر لهم فلوسهم، أى مشروب هيكون عليه مشروب مجانى، مهما كان عدد الزباين كتير».
لوجو «الشنب» شعار خصصه «جمال» للتعبير عن اليوم، حيث رسمه فوق كل المشروبات المقدمة للزبائن: «سواء كان الزبون ست أو راجل، هنرسم على كل المشروبات شنب ورسومات تانية بتعبر عن الرجالة، أنا محترف فى الرسم على القهوة بدقة وإتقان، وده هيكون جزء من الاحتفال باليوم».
حالة الاحتفال نفسها وصلت إلى قاعات حجز ساعات للعب البلاى ستيشن، حيث قرر أصحابها منح ساعات مجانية للرجال خلال هذا اليوم.. طارق هاشم، صاحب محل لألعاب البلاى ستيشن فى محافظة الإسكندرية، قرر منح ساعة مجانية للرجال خلال اليوم: «أى مجموعة من الشباب هيحجزوا ساعة هيأخدوا ساعة تانية مجانية ده غير خصم 10% على الساعة الأولى بمناسبة الاحتفال باليوم العالمى للرجل»، مؤكداً أن هذه الحالة ستضيف زبائن للمكان من الشباب والفتيات، لكن هذا العرض يقتصر على الشباب فقط: «الستات والبنات عندهم احتفالات كتير، عالمية ومصرية، عشان كده خلينا العرض ده قاصر على الرجال فقط، إحنا ناويين نقدر بعضنا فى اليوم ده وننبسط».
وحسب «هاشم» فإنه منذ اللحظة الأولى التى أعلن فيها عن تلك الفكرة لاقت إعجاب الكثير من الشباب: «فرحوا جداً، حسوا إنهم متقدرين، دائماً العروض بتكون للبنات فى كل حاجة، الرجالة منسيين ومحدش مقدرهم».
خصم 25% على الاشتراكات الخاصة بالجيم احتفالاً باليوم العالمى للرجل، دعوة أطلقها شريف الجعار، صاحب جيم فى مدينة الزقازيق بمحافظة الشرقية، حيث قرر أن يشارك الرجال فرحتهم خلال اليوم بهذا العرض المغرى: «الجيم بيعتبر أسلوب حياة لكتير من الشباب، وكتير مش بيقدروا يحجزوا فى مراكز الجيم عشان مكلفة، عشان كده قررت أخصم لأى شاب هيحجز خلال اليوم وهياخد أول جلسة تدريب فى الجيم مجانية خارج الخصم والاشتراك».
